Tbilisi Open Air 2025 დასრულდა

25 მაისს Tbilisi Open Air 2025 დაიხურა. ფესტივალი 24 მაისს გაიხსნა და ორი დღის განმავლობაში გაგრძელდა. წლევანდელი ლაინაფი სრულად ქართველი არტისტებით იყო დაკომპლექტებული, რაც უკავშირდებოდა ფესტივალის ერთ-ერთ იდეას – ქართველი არტისტებისადმი  სოლიდარობასა და მხარდაჭერას.

Tbilisi Open Air 2025-ის ერთ-ერთი მთავარი აქცენტი მუსიკალურ კოლაბორაციებზე გაკეთდა. მთავარი სცენის პროგრამაში თანამედროვე ბენდებთან ერთად მოწვეული იყვნენ ისეთი შემსრულებლები, როგორებიც არიან: მერაბ სეფაშვილი, ნანი ბრეგვაძე, გიული ჩოხელი, პაატა ბურჭულაძე.

ფესტივალის დასკვნით საღამოს, 25 მაისს, მსმენელის წინაშე მთავარ სცენაზე წარდგნენ: MECHANICAL RAINBOW, KORDZ და ნანი ბრეგვაძე, მწვანე ოთახი და გიული ჩოხელი, პაატა ბურჭულაძე, LOUDSPEAKERS, ბექა გოჩიაშვილი & თემურიკო დიასამიძე, ლუკა გოჩიაშვილი & MUSHONE, ხატია ქორიძე, KILLAGES, KOA & TAHA, SOFTEJECT SYSTEM, გამოუვალი მდგომარეობა, WILL KOLAK, PSYCHONAUT 4, TAPE VISITORS.

ფესტივალის განსაკუთრებული სანახაობა სუხიშვილების ქორეოგრაფიული წარმოდგენა იყო, რომელსაც მთავარი სცენა დაეთმო. მათ ხორუმი

შეასრულეს, რის შემდეგაც ნიკა კოჩაროვთან ერთად საქართველოს ეროვნული ჰიმნი იმღერეს.

როგორც ფესტივალის მედიამენეჯერმა სოფო ებრალიძემ Billboard Georgia-სთან საუბრისას აღნიშნა, წლევანდელი Tbilisi Open Air-ის მთავარი გზავნილი სოლიდარობა იყო: „სოლიდარობა ქართველ არტისტებს, მედიას, რეჟიმის პატიმრებს და ყველა იმ ადამიანს, ვინც სისტემის მხრიდან ჩაგვრას განიცდის.“

ორგანიზატორების თქმით, მხოლოდ ქართველ არტისტებზე ორიენტირებული ლაინაფის იდეა იმ რეალობას პასუხობს, რომ ადგილობრივ მუსიკოსებს განსაკუთრებით სჭირდებათ მხარდაჭერა. აღსანიშნავია, რომ ბილეთებიდან მიღებული შემოსავლის ნაწილი სხვადასხვა პროფკავშირს გადაეცემა.

Tbilisi Open Air 2025 მსმენელს ერთი წლით დაემშვიდობა. ფესტივალი 2026 წელს ახალი ჰედლაინერებით დაბრუნდება.

იხილეთ ფოტოები: