როკის ლეგენდარული გიტარისტი რიკ დერინჯერი 27 მაისს, ოჯახის გარემოცვაში, 77 წლის ასაკში გარდაიცვალა. ინფორმაციას ფეისბუქზე ტონი უილსონი ავრცელებს.
„დერინჯერის მემკვიდრეობა მუსიკის ფარგლებს სცდება, იგი ათწლეულების განმავლობაში გულშემატკივრებს ერთმანეთთან ენერგიითა და გამორჩეული ნიჭით აკავშირებდა. მისი გარდაცვალება მუსიკალურ სამყაროში დიდ სიცარიელეს დატოვებს, ძალიან მოგვენატრება მის გულშემატკივრებს, კოლეგებსა და საყვარელ ადამიანებს. ” – წერია გავრცელებულ განცხადებაში.
მიუხედავად იმისა, რომ განცხადებაში გარდაცვალების მიზეზი არ სახელდება, გამოცემა Variety-ს ცნობით, რიკ დერინჯერს ბოლო თვეებში ჯანმრთელობის სერიოზული პრობლემები ჰქონდა.
დერინჯერის, როგორც გიტარისტის, მომღერლის, კომპოზიტორისა და პროდიუსერის კარიერა ექვს ათეულ წელს მოიცავს. მუსიკოსმა პირველ წარმატებას ჯგუფ The McCoys-თან ერთად მიაღწია, აღსანიშნავია მათი 1965 წლის ჰიტი Hang On Sloopy. კარიერის განმავლობაში დერინჯერმა არაერთ ცნობილ არტისტთან ითანამშრომლა, მათ შორის არიან: სინდი ლოპერი, ბარბრა სტრეიზანდი, ელის კუპერი, KISS და Weird Al Yankovic.
მუსიკოსის ოთხი ალბომი მოხვდა Billboard 200-ის ჩარტში: 1974 წლის All American Boy 25-ე ადგილზე გავიდა, Spring Fever და The Edgar Winter Group with Rick Derringer (1975) და 1977 წელს – Derringer Live. დერინჯერის ერთ-ერთი ალბომი, Free Ride (2002), Jazz Albums ჩარტშიც შევიდა.
რიკ დერინჯერის მუსიკალურ მემკვიდრეობაში განსაკუთრებით აღსანიშნავია ორი სიმღერა: Rock and Roll, Hoochie Koo და Real American. პირველი სიმღერა 1974 წელს Billboard Hot 100-ზე 23-ე ადგილს იკავებდა, რაც მუსიკოსის კარიერაში საუკეთესო პოზიცია იყო. Real American კი ფართოდ არის ცნობილი, როგორც პროფესიონალი მოჭიდავის, ჰალკ ჰოგანის თემატური სიმღერა.
აღსანიშნავია, რომ Real American ბარაკ ობამას, ჰილარი კლინტონისა და მოქმედი პრეზიდენტის, დონალდ ტრამპის კამპანიებშიც აქტიურად გამოიყენებოდა. 2017 წელს დერინჯერი ამ სიმღერის ახალ ვერსიაზე მუშაობდა, მუსიკოსს სურდა, კომპოზიცია პოლიტიკისგან დაეცალა და ეროვნული ერთობისთვის გაესვა ხაზი. – ამის შესახებ ინფორმაცია მისმა მენეჯერმა და ბენდის დრამერმა, კენ მოუტენოტმა გაავრცელა.
რიკ დერინჯერი აქტიურად წერდა მუსიკას 2022 წლამდეც. ამავე წელს გამოვიდა მისი ახალი სიმღერა Let It Be the Blues, რომელსაც წინ უძღოდა 2018 წლის ქავერი აიმი ციმერმანის კომპოზიციაზე Always Be Your Mom სადაც მუსიკოსმა დუეტი მეუღლესთან, ჯენდასთან ერთად შეასრულა.
