მართალია, ჩარლზ III ინგლისის მეფეა, მაგრამ ოზი ოსბორნი სამუდამოდ დარჩება ბნელეთის პრინცად. როკლეგენდის ცხოვრებისა და შემოქმედების პატივსაცემად კი სამეფო ოჯახის ოფიციალური არმიის ბენდმა Black Sabbath-ის ჰიტი შეასრულა.
ვიდეოში, რომელიც მცველების შეცვლის ცერემონიაზეა გადაღებული, წითელუნიფორმიანი მუსიკოსები ბუკინგემის სასახლის ეზოში დგანან და Paranoid-ს უკრავენ – სიმღერას, რომელიც 1970 წელს Billboard Hot-ში შევიდა.
@about.london The Band of the Coldstream Guards perform “Paranoid” by Black Sabbath at Changing of the Guard today. RIP to Ozzy Osbourne the “Prince of Darkness” #guard #kingsguard #ozzyosbourne #blacksabbath #paranoid #heavymetal #rockband #london #buckinghampalace #fyp ♬ original sound – about.london
ოზი ოსბორნი 22 ივლისს 76 წლის ასაკში გარდაიცვალა, მისი და Black Sabbath-ის ფინალური კონცერტიდან რამდენიმე კვირის შემდეგ.
ამ დღეებში მუსიკოსისადმი მიძღვნილმა პოსტებმა სოციალური მედია წალეკა. მათ შორის არის მწუხარების წერილები Black Sabbath-ის ყოფილი წევრებისგან. ოსბორნი 30 ივლისს მის მშობლიურ ქალაქ ბირმინგემში დაკრძალეს, სადაც ფანები გრძელ რიგებში იდგნენ საყვარელი მუსიკოსისთვის პატივის მისაგებად.
სამეფო ტახტის დაკავების შემდეგ ჩარლზი ხშირად იყენებს სამხედრო ბენდს. ივნისში „პრაიდის” პატივსაცემად მათ ჩეპელ როუნის Pink Pony Club შეასრულეს.
სამხედრო ბენდის გამოსვლები უკავშირდება მუსიკისადმი მეფის სიყვარულს, რაც ჩარლზმა წლის დასაწყისში Apple Music-ის რადიოშოუს, The King’s Music Room-ის დაწყებით გაამხილა.
„მთელი ცხოვრების განმავლობაში მუსიკა ყოველთვის ბევრს ნიშნავდა ჩემთვის. მას აქვს უნარი, გაგახსენოს ბედნიერი მოგონებები, დაგამშვიდოს სევდიანობის დროს და გამოგზაუროს შორეულ ადგილებში. თუმცა ყველაზე მეტად, მას აქვს უნარი, აამაღლოს ჩვენი განწყობა და გაგვაერთიანოს კარგი ამბების დროს,” – აღნიშნა ჩარლზმა.
