CBS-ის Late Show With Stephen Colbert, რომელიც ბოლო სეზონს იწყებს, პირველად დაჯილდოვდა Emmy-ს საუკეთესო თოქ-შოუს კატეგორიაში.
შოუს ეს ჯილდო 14 სექტემბერს 2025 წლის Emmy Awards-ზე გადაეცა, სადაც პროექტმა Jimmy Kimmel Live! და შარშანდელი გამარჯვებული – The Daily Show დაამარცხა.
სანამ კატეგორიის წარმდგენი ბრაიან კრანსტონი The Late Show-ს გამარჯვებულად გამოაცხადებდა, ლოს-ანჯელესის Peacock Theater-ის აუდიტორია შოუს ოვაციებით მიესალმა, შემდეგ კი კოლბერტი და მისი გუნდის წევრები სცენაზე ავიდნენ.
„მინდა მადლობა გადავუხადო CBS-ს, რომ მოგვცა პრივილეგია, ვიყოთ ღამის შოუს ტრადიციის ნაწილი, რომელიც, იმედი მაქვს, გაგრძელდება მაშინაც კი, როცა ჩვენ აღარ ვიქნებით,“ – თქვა კოლბერტმა თავის სიტყვაში. მან ასევე მადლობა გადაუხადა ადამიანებს, რომლებიც The Late Show-ზე მუშაობენ: „ვამაყობ, რომ თქვენს შორის ვარ,” – აღნიშნა კოლბერტმა.
CBS-მა ივლისში განაცხადა, რომ 2025-26 წლების სეზონი The Late Show-სთვის ბოლო იქნება – არა მხოლოდ კოლბერტის წამყვანობით, არამედ მთლიანად ფრენჩაიზისთვის, რომელიც 1993 წელს დაიწყო და ლეტერმანი უძღვებოდა. ტელეკომპანიამ გადაწყვეტილებას „ფინანსური“ მიზეზებით გამოწვეული უწოდა. გავრცელებული ინფორმაციით, შოუს წლიურად 40 მილიონ დოლარამდე ზარალი ჰქონდა.
საუკეთესო თოქ-შოუს კატეგორიაში წელს მხოლოდ სამი ნომინანტი იყო, რადგან განაცხადები სულ 13-მა შოუმ წარადგინა. 2023 წელს ნომინირებულთა რაოდენობა ხუთი იყო.
სიტყვის ბოლოს, კოლბერტმა აღნიშნა: „10 წლის წინ დავისახე მიზნად, შემექმნა ღამის შოუ სიყვარულზე, თუმცა მოგვიანებით მივხვდი, რომ ჩვენ ვაკეთებდით კომედიურ შოუს დანაკარგზე. ეს მაინც სიყვარულთან არის დაკავშირებული, რადგან ზოგჯერ მხოლოდ მაშინ აცნობიერებ, რამდენად გიყვარს რამე, როცა ხვდები, რომ შეიძლება დაკარგო. 10 წლის შემდეგ, 2025 წლის სექტემბერში გავაცნობიერე, მე არასოდეს მყვარებია ჩემი ქვეყანა ასე ძალიან. ღმერთი ჰფარავდეს ამერიკას. იყავით ძლიერები, გაბედულები და თუ ლიფტი ცდილობს, დაბლა დაგწიოთ, გაბრაზდით და დააჭირეთ უფრო მაღალ სართულს.“
