Florence + The Machine-ის Everybody Scream ამ კვირის ფანების რჩეული მუსიკა გახდა. „ბილბორდის” გამოკითხვაში, რომელიც 31 ოქტომბერს გამოქვეყნდა, მონაწილეებმა ხმათა უმრავლესობით სწორედ ფლორენს უელჩის ახალი ნამუშევარი აირჩიეს.
Everybody Scream ჰელოუინის დღეს გამოვიდა. ამავე კვირაში ახალი მუსიკა გამოსცეს Tyler, The Creator-მა, რენე რეპმა, ბრენტ ფაიაზმა და სხვებმა. Florence + The Machine-ის მეექვსე სტუდიურმა ალბომმა ხმების 53% დააგროვა.
ალბომი ზუსტად შეესაბამება მისი გამოსვლის დროს. „ამ ალბომზე მუშაობისას ვერ ვიაზრებდი, თუ რამდენად ახლოს იყო სიკვდილი,” – აღნიშნა უელჩმა L’Officiel-თან ინტერვიუში. „შემდეგ კი მივხვდი, რომ სიკვდილი უბრალოდ პორტალია. თუ წინა ალბომი (Dance Fever) ნამდვილი ზღაპარი იყო, ეს ალბომი საშინელებათა ფილმია, ასე რომ, ყველაფერმა მნიშვნელობა შეიძინა.”
სიკვდილზე საუბრისას უელჩი საკუთარ გამოცდილებას გულისხმობს, როცა ექტოპიური ორსულობის შედეგად 2023 წელს გადაუდებელი ქირურგიული ჩარევა დასჭირდა. „როგორც ხედავთ, მწუხარების შადრევნით ვარ წარმოდგენილი, რომელში გზის გაკვლევასაც ვცდილობ. მე ვიყავი ნისლში, სადაც მნიშვნელობა და ჩემი პირადი რწმენათა სისტემა უნდა მეპოვა.”
„ეს ყველაზე პირადი ალბომია, რაც კი ოდესმე შემიქმნია, მაგრამ ამავდროულად ყველაზე მითოლოგიურიც. მინდოდა, ჩემი საკუთარი ხალხური საშინელებათა სიმღერები შემექმნა,” – ამბობს მუსიკოსი ინტერვიუში.
ალბომის გამოსვლას Everybody Scream-ის ტურნე მოსდევს, რომელიც 2026 წლისთვისაა დაგეგმილი. უელჩის თქმით, სცენა მისთვის ის ადგილია, სადაც შეუძლია, მისი გრძნობები მთელი სიდიდით გამოუშვას. „როცა შეშლილი ვარ, რაც ხშირად ხდება, და ვგრძნობ, რომ მინდა, ვიყვირო, მაგრამ ვერ ვყვირი; მინდა, ვიტირო, მაგრამ ვერ ვტირი; ან მინდა, სხეულიდან ეს ყველაფერი თუნდაც ძალით გამოვიტანო. ეს არის ჩემი საყვარელი ნაწილი სიმღერებში, რომ ისინი ერთდროულად უამრავ რამეს იტევენ და სწორედ ეს მიყვარს მათ შესრულებაში.”გამოკითხვაში Everybody Scream-ს მოეორე ადგილზე მოჰყვება Tyler, The Creator-ის Mother 15%-ით, რენე რეპის Lucky 6%-ით და ბრენტ ფაიაზის Have To 2%-ით. გულშემატკივართა 20%-მა კატეგორია „სხვა” აირჩია.
