რამდენიმეწლიანი ვარაუდების შემდეგ ბელგიური საცეკვაო ფესტივალის, Tomorrowland-ის ორგანიზატორებმა დაადასტურეს, რომ 2026 წელს ისინი ტაილანდურ სეზონს ხსნიან.
აღნიშნული მოვლენა აზიაში Tomorrowland-ის დებიუტი იქნება, რაც მოჰყვება ფესტივალის გამოშვებებს აშშ-ში, ბრაზილიასა და მის ზამთრის სეზონს საფრანგეთის ალპებში. ეს ყველაფერი კი, რა თქმა უნდა, ფესტივალის ყოველწლიურ მთავარ გამოშვებასთან ერთად ბუმში, ბელგიაში, რომელსაც უკვე 20 წლის ისტორია აქვს.
Tomorrowland ტაილანდში 2026 წლის 11-13 დეკემბერს გაიმართება. ლოკაციად პატაია შეირჩა – ტერიტორია, რომელიც ცნობილია თავისი ბუნებითა და სილამაზით. ბელგიის ზაფხულის ფესტივალისგან განსხვავებით, ტაილანდში Tomorrowland დამსწრეებს კემპინგის ადგილებს არ შესთავაზებს. ამის ნაცვლად, იქნება სასტუმროს პაკეტები, რომლებიც 28 თებერვლიდან გაიყიდება. თავად ფესტივალის ბილეთების შეძენა კი 8 მარტიდან იქნება შესაძლებელი.
გავრცელებულ განცხადებაში Tomorrowland-ის ორგანიზატორებმა აღნიშნეს, რომ ფესტივალი ტაილანდის მთავრობასთან, კერძოდ, ტაილანდის ტურიზმის ადმინისტრაციასთან პარტნიორობით იმართება.
„რამდენიმე აზიურ ლოკაციას შორის ტაილანდის შერჩევა ხაზს უსვამს მის მზარდ გავლენას გლობალური მუსიკის სცენაზე, ინოვაციასა და გამოცდილებაზე ორიენტირებულ ტურიზმზე. ამ მასშტაბის ფესტივალს მნიშვნელოვანი გავლენა აქვს ადგილობრივ და ეროვნულ ეკონომიკაზე, ტურიზმის ზრდაზე, სტუმარ-მასპინძლობის სექტორსა და შემოქმედებითი ინდუსტრიების განვითარებაზე იმ ფონზე, რომ ის მთელი მსოფლიოდან ჩამოსულ სტუმრებს მასპინძლობს. Tomorrowland ტაილანდი არა მხოლოდ ახალ აუდიტორიას გააცნობს ფესტივალის მაგიას, არამედ ტაილანდს გლობალური ყურადღების ცენტრში მოაქცევს, როგორც ფართომასშტაბიანი კულტურული და გასართობი გამოცდილებების ჰაბს.”
განცხადება გაავრცელა ასევე ტაილანდის ტურიზმის ადმინისტრაციამ: „Tomorrowland-ის მასპინძლობა ტაილანდში მნიშვნელოვანი ნაბიჯია ჩვენი მიზნისკენ, მოხდეს ქვეყნის პოზიციონირება, როგორც ლიდერის გლობალურ ტურიზმსა და შემოქმედებით გამოცდილებებში. ერთი სული გვაქვს, ვუმასპინძლოთ ადამიანებს მთელი მსოფლიოდან, რომ აღმოაჩინონ ტაილანდის სილამაზე, კულტურა და სტუმარ-მასპინძლობა.”
