კომპანია FLITZ Collective მიუსაფარ ცხოველებთან დაკავშირებით განვითარებულ მოვლენებს ეხმიანება. Billboard საქართველო განცხადებას უცვლელად გთავაზობთ:
„გვინდა გამოვეხმაუროთ ამ დღეებში მომხდარ შემაძრწუნებელ ფაქტებს ცხოველების უფლებების უხეშად დარღვევის მიმართულებით და გამოვხატოთ სოლიდარობა ჩვენი ოთხფეხა მეგობრებისადმი.
ასევე, ჩვენი გუნდის სახელით გამოვხატავთ სრულ მხარდაჭერას ცხოველთა უფლებების დამცველი ორგანიზაციების მიმართ.
მოგეხსენებათ, წელს Flitz Collective ვმასპინძლობთ Moby-ს, მსოფლიოში ყველაზე ცნობილ ცხოველთა უფლებებისთვის მებრძოლ მუსიკოსს.
ცხადია, ვგრძნობთ პასუხისმგებლობას, გამოვეხმაუროთ მიმდინარე მოვლენებს და დავაფიქსიროთ ჩვენი პოზიცია.
როგორც ყოველთვის, Moby-ს შოუები გამოირჩევა განსაკუთრებული მხარდაჭერით ცხოველების უფლებებისა და მათი დამცველი ორგანიზაციების მიმართ, ამ ფაქტამდეც დაწყებული გვქონდა მუშაობა ადგილობრივ ორგანიზაციებთან მათთვის ტერიტორიაზე განსათავსებელი სივრცეების გამოყოფის მიზნით, ასევე უშუალოდ კონცერტამდე პერიოდში შესაძლებელი იქნება დონაციების გაკეთება ჩვენი და ჩვენი პარტნიორი პლატფორმების საშუალებით. ამ მიმართულებას რეგულარული სახე მიეცემა ჩვენს მიერ დაგეგმილ ღონისძიებებზე.
ტექნიკური დეტალების გამართვის შემდეგ გავასაჯაროებთ ამ ინფორმაციასაც…“ – ნათქვამია განცხადებაში.
