Diddy ნიუ-ჯერსიში მდებარე დაბალი უსაფრთხოების დონის ციხიდან პენსილვანიის ფედერალურ დაწესებულებაში გადაიყვანეს. ინფორმაცია Billboard-ს დაუდასტურეს.
ციხეების ფედერალური ბიუროს წარმომადგენელმა Billboard-ს განუცხადა, რომ კომბსი 16 ოქტომბერს Fort Dix-ის ე.წ. დაბალი უსაფრთხოების დონის ციხიდან პენსილვანიის Allenwood-ის მსგავს ფედერალურ დაწესებულებაში გადაიყვანეს: „კონფიდენციალურობის, უსაფრთხოებისა და დაცვის მიზნით ჩვენ არ განვიხილავთ ჩვენს პატიმრობაში მყოფი არცერთი პირის დაკავების პირობებს, მათ შორის გადაყვანის მიზეზებს,“ – აღნიშნა ციხის წარმომადგენელმა.
ნიუ-ჯერსიში მდებარე Fort Dix-ის ციხე და პენსილვანიაში მდებარე Allenwood-ის დაწესებულება უსაფრთხოების ერთსა და იმავე, დაბალ კატეგორიას განეკუთვნება. პარასკევს Billboard კომბსის წარმომადგენლებსაც დაუკავშირდა, თუმცა ამ დრომდე მათ კომენტარი არ გაუკეთებიათ.
კომბსი Fort Dix-ის ციხეში 2025 წლის ოქტომბრიდან იმყოფებოდა. ის იქ მას შემდეგ გადაიყვანეს, რაც პროსტიტუციის მიზნით ორგანიზებული ღონისძიებების მოწყობისთვის ოთხი წლით თავისუფლების აღკვეთა მიუსაჯეს. მანამდე, ერთი წლის განმავლობაში, Diddy ბრუკლინში მდებარე Metropolitan Detention Center-ში იხდიდა წინასწარი პატიმრობის ვადას, რომელიც სასჯელის საერთო ხანგრძლივობაში ჩაეთვლება.
გავრცელებული ინფორმაციებით, ყოფილი მუსიკალური მაგნატი Fort Dix-ის ციხეში გადაყვანის შემდეგ რამდენიმე კონფლიქტში მონაწილეობდა და კარცერშიც არაერთხელ მოხვდა.
სექტემბერში NBC News-ის ჟურნალისტურმა გამოძიებამ გაავრცელა ინფორმაცია, რომ კომბსი Fort Dix-ის ციხეში „პრივილეგირებული“ პირობებით სარგებლობდა. გამოძიების თანახმად, მას ჰქონდა წვდომა კონტრაბანდულ სმარტფონებზე, ჩინური სტილის მასაჟებსა და Hennessy-ს კონიაკზე.
ამჟამინდელი მონაცემებით, კომბსის გათავისუფლება 2028 წლის მარტშია დაგეგმილი, თუმცა პატიმრობის ბიუროს მიერ გამოქვეყნებული გათავისუფლების განრიგი შესაძლოა შეიცვალოს.
ამასთან, კომბსი სააპელაციო სასამართლოს სასჯელის შემცირებას სთხოვს. ის ფედერალური კანონმდებლობით გათვალისწინებული პროსტიტუციასთან დაკავშირებული დანაშაულებისთვის დაკისრებული სასჯელის გასაჩივრებისას ამტკიცებს, რომ მოსამართლემ უგულებელყო ნაფიცი მსაჯულების გადაწყვეტილება, რომლითაც ის უფრო მძიმე ბრალდებებში – ორგანიზებული დანაშაულებრივი საქმიანობისა და სექსუალური ტრეფიკინგის საქმეზე გაამართლეს.
