ქართულ მუსიკალურ სივრცეში ლეიბლი სახელწოდებით ONEONEWORLD გამოჩნდა. პლატფორმაზე უკვე არაერთი კოლაბორაციული ნამუშევარი გამოიცა, ამჯერად კი ლეიბლმა ტრეკი TAIFUN და მასზე გადაღებული მუსიკალური ვიდეო წარადგინა.
ტრეკის ავტორები და შემსრულებლები არიან: Tashyo, Amikko, SabanaYesYes და akasix6six. მუსიკალურ ვიდეოზე ONEONEWORLD-მა ჰიპ-ჰოპ მოძრაობა „კვალთან“ ერთად იმუშავა. საოპერატორო ნამუშევარი ტატო კოტეტიშვილს ეკუთვნის, პოსტ-ფროდაქშენი და მონტაჟი კი – Vinda Folio-ს.
SabanaYesYes:
„ვიდეოს და ტრეკის იდეა ტრიალებს „შეკეთების“ და „თავის მოვლის“ გარშემო. ვიდეოს კონცეფცია აწყობილია მაგიური რეალიზმის ირგვლივ – გვინდოდა, გადმოგვეცა შინაგანი სამყაროს ინტერაქცია გარემოსთან, მათი საზღვრები და აღქმის ჯადოსნურობა. ტრეკი შეიქმნა სპონტანურად. მე და ტაშიო მივედით სტუდიაში და ამიკოს და აკას ველოდებოდით, დაგეგმილი გვქონდა მუშაობა საერთოდ სხვა ტრეკზე. სანამ მოვიდოდნენ, ტაშიომ მთხოვა, გუშინ რომ ბიტს აკეთებდი, ჩამირთეო და ჩაწერა მისამღერი. როცა სტუდიაში ყველა შევიკრიბეთ, აღარც ვიმუშავეთ დაგეგმილ ტრეკზე და მთლიანად მივყევით „Freestyle magic”-ს. შემდეგ დაიწერა ამიკოს, აკას, ჩემი და ტაშიოს ვერსები. ტრეკის კეთების პროცესში ყველა ვგრძნობდით, რომ ეს ნამუშევარი განსაკუთრებული იყო და ვიდეოს გადაღება გვინდოდა.
„სცენარი მე და ტაშიოს დაახლოებით უკვე გვქონდა თავში, იდეა გავუზიარეთ გიორგი ნინიკაშვილს, „კვალის“ დამფუძნებელს, რომელიც შემდგომში კლიპის პროდიუსერი გახდა. ვიდეოზე მუშაობის პროცესი იყო საკმაოდ ხანგრძლივი და შრომატევადი, მაგრამ გასართობიც. საინტერესო იყო ლოკაციებზე ნადირობა და სცენების აწყობა ტატოსთან ერთად. მუშაობის პროცესში ჩართული ადამიანებისგან ბევრი რამ ვისწავლეთ და მადლობა მათ ამისთვის. განსაკუთრებით უნდა აღვნიშნო “კვალის” როლი, რომლოს გარეშე ეს ვიდეო არ გამოვოდოდა,” – SabanaYesYes.
რაც შეეხება ONEONEWORLD-ს, როგორც ლეიბლის გუნდი აღნიშნავს, ეს არის სივრცე, სადაც განსაკუთრებულობა ხვდება ერთიანობას.
SabanaYesYes:
„სამომავლო გეგმები ბევრია, ზოგი დიდი, ზოგიც ძალიან დიდი. თუმცა ყველაზე მთავარია, რაც შეიძლება მეტი ხარისხიანი და საინტერესო ქართულენოვანი (და არა მხოლოდ) მუსიკის შექმნა და მსმენელისთვის გაზიარება“.
