3 ოქტომბერს გერმანიაში, ბონში, ქართველი მუსიკოსების კონცერტი გაიმართება. კონცერტი ბეთჰოვენფესტზე ლიზა ბათიაშვილის რეზიდენციის ფინალური გამოსვლა იქნება. ქართველი მევიოლინე სცენას თავისი ფონდის, Lisa Batiashvili Foundation-ის სამ სტიპენდიანტთან ერთად გაიზიარებს. ესენი არიან: ცოტნე ზედგინიძე, სანდრო ნებიერიძე და გიორგი მარდალეიშვილი. შესრულდება კამერული მუსიკის ნაწარმოებები, მათ შორის იოსებ ბარდანაშვილის მიერ გია ყანჩელისადმი მიძღვნილი კომპოზიცია.
კონცერტი ბეთჰოვენფესტის ფარგლებში შედგება, რომელიც 3 სექტემბრიდან 3 ოქტომბრამდე გაიმართება. წელს ფესტივალის რეზიდენტი მუსიკოსი სწორედ ლიზა ბათიაშვილი იქნება. დასკვნითი კონცერტის გარდა, ქართველი მევიოლინე Beethovenhalle-ის სცენაზე კიდევ ორჯერ წარდგება – 20 და 25 სექტემბერს დრეზდენის ფილარმონიულ ორკესტრთან ერთად. აღსანიშნავია, რომ 20 სექტემბრის კონცერტზე ორკესტრს ნიკოლოზ რაჭველი უდირიჟორებს.
