გარდაცვალებიდან თითქმის ერთი წლის შემდეგ ოზი ოსბორნი ბრუნდება – ამჯერად ხელოვნური ინტელექტის მიერ შექმნილი ავატარის სახით.
ახალი ამბავი მუსიკოსის ვაჟმა ჯეკ ოსბორნმა 20 მაისს ლას-ვეგასის Licensing Expo-ზე, ოზის ბრენდის მომავალზე საუბრისას გაამხილა. საუბარში ასევე მონაწილეობდა მუსიკოსის მეუღლე შერონ ოსბორნი.
„შიშის მომგვრელიც კია, იმდენად ზუსტია,” – თქვა ჯეკმა მუსიკოსის ავატარზე. „ის ციფრული სახით იარსებებს იმდენ ხანს, რამდენ ხანსაც კომპიუტერები იარსებებენ. ტექნოლოგია იმდენად განვითარდა, რომ შენ შეგიძლია გადაიღო რეკლამის შაბლონი, უბრალოდ მიუთითო, თუ რა გინდა, რომ ციფრულმა ოზიმ ამ რეკლამაში გააკეთოს და პირდაპირ ჩასვა. ახლა ეს უკვე ძალიან მარტივია.”
ოსბორნის ავატარზე კომპანიები Hyperreal და Proto Hologram მუშაობენ. Hyperreal-ის თქმით, მისი ციფრული დნმ-ის ტექნოლოგიით „ავატარი შეძლებს ფანებთან ინტერაქციას, მოძრაობას, საუბარს და ისე მოქცევას, როგორც ნამდვილი ოზი.” „ბილბორდთან” საუბარში კომპანია აღნიშნავს, რომ ავატარი 2026 წლის ზაფხულიდან აშშ-სა და დიდ ბრიტანეთში, Proto Luma-ს ადამიანის ზომის ინტერაქტიურ ეკრანებში გამოჩნდება,
„ავატარის თითოეული ელემენტი შექმნილია ავთენტური, დამტკიცებული მასალების საფუძველზე და ყველაფერი შეთანხმებული, შერჩეული და გაკონტროლებულია იმ ადამიანების მიერ, ვისაც ის ყველაზე მეტად უყვარს,” – ამბობს Hyperreal-ის აღმასრულებელი დირექტორი. „ეს უბრალოდ ვიზუალური რენდერი არ არის, ეს ცოცხალი პერფორმანსია, რომელშიც არაფერია გამოყენებული უნებართვოდ. ჩვენ გვაქვს ოზის ოჯახის სრული მხარდაჭერა და ენთუზიაზმით სავსე ჩართულობა ამ პროექტში და ეს ყველაფერს ცვლის.”
„პატივია ამხელა ნდობის მიღება, რომ როკის ნამდვილი ღმერთი სამყაროში დავაბრუნოთ, რათა მან განაგრძოს ფანებთან ურთიერთობა. მადლობას გიხდით, შერონ და ჯეკ!” – აღნიშნა Proto Hologram-ის დამფუძნებელმა. „ამ პროექტს არ შევეჭიდებოდით, რომ არ ვიცოდეთ, რომ ამ ორი კომპანიის ტექნოლოგიებით შეგვიძლია შევქმნათ გამოცდილება, რომელიც ნამდვილად გააძლიერებს ოზის არსებობას და მის სულს მომავალში.”
ეს არ არის პირველი შემთხვევა, როცა Hyperreal ცნობილი ადამიანის ციფრულ ავატარს ქმნის. წარსულში მათ მიერ შექმნილი ავატარები მოიცავს The Notorious B.I.G-ს, ლიონელ მესის და მარველის კომიქსების ავტორ სტენ ლის.
