Drake-მა ახალი პროექტის, Fear of Missing Out-ის კიდევ ერთი თიზერი გაავრცელა.
12 სექტემბერს სუპერვარსკვლავმა სოციალურ ქსელში 25-წამიანი ვიდეო გააზიარა, რომელსაც შემდეგი აღწერა ახლავს: „არც ისე მოკლე ფილმი“.
ინსტაგრამზე გამოქვეყნებული პოსტის აღწერა ასე გრძელდება: „მუსიკალურად გაფორმებულია ოჯახის მიერ“, სადაც ასევე აღნიშნულია, რომ პროექტის პრემიერა 15 სექტემბერს შედგება.
ვიდეოში მწვანე ნეონისფერი კატერი ჩანს, შორიდან ქალაქის ხედი იშლება, საჭეს კი, სავარაუდოდ, თავად Drake მართავს.
„რა მოხდებოდა, რომ გითხრათ, რომ თქვენი ცხოვრების ორი განსხვავებული ვერსია არსებობს? ერთ ვერსიაში რისკს ერიდებით და სიყვარულისგან თავს შორს იჭერთ. გრძნობთ, რომ საკუთარ თავს შორდებით. ეძებთ რაღაცას, რასაც ვერ პოულობთ. ხოლო ცხოვრების მეორე ვერსიაში თქვენ მას პოულობთ.“ – ისმის ქალის ხმა კადრს მიღმა.
თიზერი Fear of Missing Out-ის შავ-თეთრი პოსტერით სრულდება.
არტისტმა FOMO-ს შესახებ პირველად მინიშნებები სექტემბრის დასაწყისში დააანონსა, როდესაც YouTube-ზე 15 სექტემბერს დაგეგმილი პირდაპირი ეთერის შესახებ გაავრცელა ინფორმაცია. პირველი თიზერის გამოშვების შემდეგ გულშემატკივრების ნაწილი ვარაუდობდა, რომ ეს, შესაძლოა, ახალი მუსიკა, ვიდეორგოლი ან ტურნე ყოფილიყო.
Drake-მა მაისში ალბომების – ICEMAN, HABIBTI და MAID OF HONOUR გამოშვებით ისტორია დაწერა, რის შემდეგაც ის პირველი არტისტი გახდა, რომელმაც Billboard 200-ში ერთდროულად საუკეთესო სამეულის ყველა ადგილი დაიკავა. ამ შედეგით მან მაიკლ ჯექსონს გადაასწრო და მამაკაც სოლო არტისტებს შორის ყველაზე მეტი N1 ჰიტის მფლობელი გახდა. გარდა ამისა, რეკორდული მაჩვენებლით – ერთ კვირაში ჩარტში ერთდროულად 42 სიმღერით მოხვდა.
ალბომ ICEMAN-ის დებიუტი Billboard 200-ზე პირველი ადგილით შედგა. ეს Drake-ისთვის კარიერაში ჩარტის სათავეში მოხვედრილი მე-15 ალბომი გახდა, რის შედეგადაც მან რეპერებს შორის ყველაზე მეტი N1 ალბომების რეკორდით Jay-Z-იც ჩამოიტოვა. ალბომი წარმატებულ სვლას განაგრძობს – Top Rap Albums-ის ჩარტში მან კარიერის საუკეთესო შედეგი დააფიქსირა და 13 კვირის განმავლობაში პირველი ადგილი დაიკავა.
ნახეთ Drake-ის Fear of Missing Out-ის უახლესი თიზერი ინსტაგრამზე:
