გრანჟის ლეგენდარულმა ჯგუფმა Nirvana-მ, 27 სექტემბერს MTV Video Music Awards-ზე Video Vanguard-ის საპატიო ჯილდო მიიღო.
ჯილდო ჯგუფის შემორჩენილმა წევრებმა: ბასისტმა კრისტ ნოვოსელიჩმა, დრამერმა დეივ გროლმა და გიტარისტმა პატ სმირმა მიიღეს. საპატიო ჯილდო მათ რეპის ლეგენდამ, Chuck D-იმ გადასცა, რომლის ჯგუფიც, Public Enemy, დაახლოებით იმავე პერიოდში ჰიპ-ჰოპის სახეს ცვლიდა, როდესაც Nirvana როკის სამყაროში ახალ ტალღას ქმნიდა.
„Nirvana არასოდეს დამორჩილებია მეინსტრიმის მოთხოვნებს“, – ასე დაიწყო სიტყვა Chuck D-იმ. „ისინი ყოველთვის საკუთარი ხედვისა და მუსიკალური მიმართულების ერთგულნი რჩებოდნენ. მათი ჟღერადობა ხმამაღალი, ლამაზი და გაბედული იყო, ტექსტები კი – პოეტური, გულწრფელი და ადამიანური. მათმა მუსიკალურმა ვიდეოებმა მთელი ეპოქა შექმნეს. ისინი სრულიად გამორჩეულნი და ყოველთვის უშიშრები იყვნენ იმ დროს, როდესაც დამკვიდრებული წესები მოქმედებდა. დღეს მათი გავლენა პრაქტიკულად ყველა თაობის არტისტის მუსიკაში ისმის.
„მარადიულად მუდამ ის არტისტები რჩებიან, ვინც ბედავს და ყოველგვარი მობოდიშების გარეშე თვითმყოფადობას ინარჩუნებს. არ მგონია, ოდესმე იარსებოს ჯგუფმა, რომელიც Nirvana-ს დაემსგავსება. მათ ეს ეპოქა სრულად დაიპყრეს.” – თქვა Chuck D-იმ.
საარქივო კადრებისგან შემდგარი ვიდეოკოლაჟის შემდეგ, სადაც ჯგუფის წევრები თავიანთ მუსიკალურ ვიდეოებს აფასებენ, მათ შორის Smells Like Teen Spirit-ს, In Bloom-სა და Heart-Shaped Box-ს – სცენაზე Moon Persons-ის ჯილდოს მისაღებად ნოვოსელიჩი, გროლი და სმირი ავიდნენ. სიტყვით ნოვოსელიჩი გამოვიდა და მადლობა გადაუხადა ყველას, განსაკუთრებით კი ჯგუფის გარდაცვლილ ფრონტმენს, კურტ კობეინს, ვინც ჯგუფის MTV-ის მემკვიდრეობის შექმნაში შეიტანა წვლილი.
„ამ ვიდეოების იდეები ყველა დროის ერთ-ერთი უდიდესი არტისტის, კურტ კობეინის ხედვიდან დაიბადა. კურტი განუმეორებელი იყო. ვერცერთი ჩვენგანი ვერ წარმოიდგენდა, რომ ჩვენი ჯგუფი, მისი ჟღერადობა თუ ესთეტიკა ამდენი ადამიანისთვის ასე ბევრს ნიშნავდა, თუმცა საბოლოოდ მუსიკამ საკუთარი ცხოვრება შექმნა და გზა გაიკვალა. Nirvana-ს გამოძახილი დღესაც ასე ძლიერად იმიტომ ჟღერს, რომ ხალხს ისევ აქვს ავთენტურობის მოთხოვნილება. ნამდვილისა და უკომპრომისოსი. რაღაც ისეთის, რაც გეუბნება, რომ სრულიად ნორმალურია, იყო ისეთი, როგორიც ხარ. კურტს ეს ჯილდო ძალიან მოეწონებოდა.“ – თქვა ნოვოსელიჩმა.
Nirvana-მ კარიერის განმავლობაში ხუთი VMA-ის ჯილდო მიიღო, მათ შორის ზედიზედ სამჯერ გაიმარჯვა „საუკეთესო ალტერნატიული ვიდეოს“ კატეგორიაში სიმღერებისთვის: Smells Like Teen Spirit (1992), In Bloom (1993) და Heart-Shaped Box (1994).
