4 დეკემბერს სტარტს აიღებს მანანა დოიჯაშვილის სახელობის 28-ე საერთაშორისო ფესტივალი „საახალწლო მუსიკალური შეხვედრები”. ფესტივალს თბილისის სახელმწიფო კონსერვატორია უმასპინძლებს, სადაც მსმენელის წინაშე მსოფლიოში აღიარებული მუსიკოსები წარდგებიან. სტუმრებს შესაძლებლობა ექნებათ, დაესწრონ ჯაზის, საფორტეპიანო, საორგანო, ვოკალური, კამერული და სიმფონიური მუსიკის საღამოებს, როგორც ქართველი, ასევე უცხოელი შემსრულებლების მონაწილეობით.
გამხსნელ კონცერტზე მსმენელის წინაშე წარდგება არი ჰოენიგის ტრიო. ჰოენიგი საერთაშორისოდ აღიარებული ჯაზმუსიკოსი, დრამერი, კომპოზიტორი და პედაგოგია, რომელიც ცნობილია დასარტყამ ინსტრუმენტებზე დაკვრის უჩვეულო მიდგომით, სადაც აქცენტი რთულ რიტმებზე კეთდება. მას გამოცემული აქვს 14 ალბომი, 3 საგანმანათლებლო წიგნი და 4 DVD, ასევე სიმღერების კრებული. მისი ჯგუფი ამჟამად გასტროლებს მსოფლიოს გარშემო მართავს და რეგულარულად გამოდის ლეგენდარულ ჯაზკლუბში Smalls. სხვადასხვა დროს ჰოენიგი თანამშრომლობდა ისეთ არტისტებთან, როგორებიც არიან: შირლი სკოტი, ჟან-მიშელ პილკი, მაიკ სტერნი, კენი ვერნერი, ჯოშუა რედმანი, უეინ კრანცი, კურტ როზენვინკელი, რობერტ გლასპერი, რიშარ ბონა, კრის პოტერი, ტუტს ტილემანსი, პეტ მარტინო და ბილი ჩაილდსი. 4 დეკემბერს კი მასთან ერთად სცენაზე წარდგებიან ნიუ-იორკის ჯაზსამყაროს ცნობილი რეზიდენტები: გადი ლეჰავი (ფორტეპიანო) და ალონ ნირი (კონტრაბასი).
ბილეთების შეძენა შეგიძლიათ ბმულზე.
20 დეკემბრის ჩათვლით ფესტივალი ჯამში 6 კონცერტს უმასპინძლებს. სიმფონიური მუსიკის საღამო შედგება 9 დეკემბერს, სადაც ალესანდრო ბონატოს დირიჟორობით სოლისტი გიორგი ვაჩნაძე და გია ყანჩელის სახელობის ახალგაზრდული ორკესტრი წარდგებიან. 12 ოქტომბერს ელენა ბაშკიროვა საფორტეპიანო მუსიკის საღამოს გამართავს, 17 დეკემბერს კი ანრი დემარკეტისა და გიორგი ვაჩნაძის მონაწილეობით კამერული მუსიკის კონცერტი გაიმართება. ნინო სურგულაძე და ოთარ ჯორჯიკია იმღერებენ 19 დეკემბერს ვოკალური მუსიკის საღამოზე. კონცერტზე დაუკრავს ფესტივალის ორკესტრი, რომელსაც რევაზ ჯავახიშვილი უდირიჟორებს. 20 დეკემბერს კი ფესტივალი საორგანო მუსიკის კონცერტით დაიხურება. მაყურებლის წინაშე ფელიქს ჰელი წარდგება.
„საახალაწლო მუსიკალური შევედრები” 1998 წელს კონსერვატორიის დიდი დარბაზის ადმინისტრაციისა და პიანისტისა და პროფესორის, მანანა დოიჯაშვილის ინიციატივით დაფუძნდა. ფესტივალის მიზანია, ხელი შეუწყოს ქვეყანაში საშემსრულებლო და სასცენო ხელოვნების განვითარებას, საკონცერტო ცხოვრების გააქტიურებას, ჯაზის, ფოლკლორისა და კლასიკური მუსიკის პოპულარიზაციას, საქართველოსა და მის ფარგლებს გარეთ მცხოვრები ქართველი მუსიკოსების გაცნობას. ფესტივალი ასევე საშუალებას აძლევს ფართო აუდიტორიას, ცოცხლად მოუსმინონ მსოფლიოში აღიარებულ მუსიკოსებსა და შემსრულებლებს.
2023 წლიდან ფესტივალს მანანა დოიჯაშვილის სახელი მიენიჭა.
