ემინემის Hot 100-ის ლიდერი Not Afraid მიჩიგანის სენატორობის კანდიდატის, აბდულ ელ-საიედის საარჩევნო კამპანიის ვიდეოში გაჟღერდა. დემოკრატმა კანდიდატმა ვიდეო 3 ნოემბრის დილას, არჩევნების დღეს გამოაქვეყნა.
„მიჩიგანო, დროა. ახლა ჩვენზეა, რომ ვაჩვენოთ ქვეყანას, რისი მიღწევაა შესაძლებელი. მსოფლიო გვიყურებს“, – დაწერა ელ-საიედმა სოციალურ ქსელში გამოქვეყნებულ პოსტში.
ემინემს ელ-საიედის კამპანიაში მისი სიმღერის გამოყენებაზე კომენტარი არ გაუკეთებია და 2026 წლის შუალედურ არჩევნებში არც რომელიმე კანდიდატისთვის გამოუხატავს საჯარო მხარდაჭერა. გამოცემა The Detroit News-ის ინფორმაციით, კამპანიის ავტორებს რეპერისთვის სიმღერის გამოყენების ნებართვაზე არ მიუმართავთ.
2024 წელს ემინემი დეტროიტში, კამალა ჰარისის მხარდასაჭერ ღონისძიებაზე გამოჩნდა, 2020 წელს კი მისი სიმღერა Lose Yourself ჯო ბაიდენის საარჩევნო რეკლამაშიც გაჟღერდა.
ახლახან რეპერმა მონაწილეობა მიიღო დეტროიტელი Kid Rock-ის სიმღერაში Heal My Faith, სადაც ემინემი მათ ხანგრძლივ მეგობრობაზე რეპავს და პოლიტიკური თუ რელიგიური განსხვავებების მიუხედავად, საზოგადოებას ერთიანობისკენ მოუწოდებს. Kid Rock ღიად უჭერს მხარს დონალდ ტრამპს. სიმღერის გამოსვლის შემდეგ ემინემმა განმარტა: „საქმე მხარეების არჩევა არ არის. მე ჩემს ძველ მეგობართან ერთად მუსიკის შექმნა ავირჩიე. ვლოცულობ ყველა ჩვენგანისთვის.”
რაც შეეხება ელ-საიედის საარჩევნო კამპანიას, სოციალურ ქსელში გავრცელებულ კადრებში ჩანს, რომ ორშაბათ საღამოს დეტროიტში გამართულ წინასაარჩევნო მიტინგზე სიმღერები მუსიკოსმა Common-მაც შეასრულა.
ელ-საიედს მხარდაჭერა გამოუცხადა ასევე მიჩიგანში დაბადებულმა სტივი უანდერმაც. არჩევნების დღეს გავრცელებულ ვიდეომიმართვაში მუსიკოსმა ამომრჩევლებს მოუწოდა, ხმა მიეცათ აბდულ ელ-საიედისთვის სენატის არჩევნებში, ჯოსლინ ბენსონისთვის გუბერნატორის არჩევნებში და დემოკრატი კანდიდატებისთვის სხვა საარჩევნო ოლქებში.
ელ-საიედის მხარდამჭერებს შორისაა ბრიუს სპრინგსტინიც, რომელმაც მას ორშაბათს საჯაროდ დაუჭირა მხარი.
„დოქტორი ელ-საიედი ამერიკის კონსტიტუციისთვის მებრძოლია. ის ამერიკული დემოკრატიის დამცველია და ეწინააღმდეგება იმ კორუმპირებულ, უკანონო და ანტიამერიკულ მმართველობას, რომელიც ამჟამად თეთრ სახლშია“, – დაწერა სპრინგსტინმა ინსტაგრამზე.
