Rosalia 2027 წლის გრემის დაჯილდოების ცერემონიისთვის მიღებულ ნომინაციებს გამოეხმაურა. მომღერალი ნომინაციების რაოდენობით მეორე ადგილზეა – მას ცხრა ნომინაცია აქვს, ხოლო წლევანდელ სიაში Raye 11 ნომინაციით ლიდერობს.
ორშაბათს, 16 ნოემბერს, ნომინაციების გამოცხადების შემდეგ, ესპანელმა არტისტმა სასიხარულო ამბავი ინსტაგრამზე, 27 მილიონზე მეტ გამომწერს გაუზიარა. გამოქვეყნებულ მოკლე ვიდეოში ჩანს, როგორ ხსნის Rosalia შამპანურის ბოთლს სახლის ეზოში და სიხარულისგან ემოციებს ვერ მალავს.
პოსტს მომღერალმა შემდეგი წარწერა დაურთო: „LUX – 10 ნომინაცია!“.
მისი ალბომი LUX ცხრა ნომინაციაზეა წარდგენილი, მათ შორის წლის ალბომის კატეგორიაში. სიმღერა Berghain, რომელშიც ბიორკი და Yves Tumor მონაწილეობენ, კი წლის სიმღერისა და წლის ჩანაწერის ნომინაციებზეა წარდგენილი. გარდა ამისა, ნამუშევარმა განსაკუთრებული აღიარება მოიპოვა არაკლასიკური მუსიკის წლის პროდიუსერის კატეგორიაშიც.
ეს სიახლე Rosalia-ს მიერ 2026 წლის ლათინო გრემის დაჯილდოებაზე მოპოვებულ წარმატებას მოჰყვა. მიმდინარე თვის დასაწყისში გამართულ ცერემონიაზე მომღერალმა ხუთი ჯილდო მიიღო, მათ შორის ყველაზე პრესტიჟული – წლის ალბომის ტიტული.
„ეს უკვე მესამე შემთხვევაა, როცა ამ ჯილდოს ვიღებ. თუ El Mal Querer ოცნება იყო, ხოლო Motomami გაბედული რისკი, მაშინ Lux შეუცნობელში გადადგმული დიდი ნახტომია” – განაცხადა მან სიტყვით გამოსვლისას რაშიც 2019 და 2022 წლებში გამარჯვებულ ალბომებს გულისხმობდა.
„მჯერა, რომ ძალიან მნიშვნელოვანია, საკუთარ სიმართლეზე ისაუბრო და სხვებსაც მისცე შესაძლებლობა, საკუთარი სიმართლე გამოხატონ. ეს ჩანაწერი სწორედ ჩემი სიმართლეა. მადლობას ვუხდი ღმერთს და ჩემს საყვარელ ადამიანებს, ოჯახსა და მეგობრებს. მადლობა სიყვარულისთვის და იმისთვის, რომ ჩამომაყალიბეთ ისეთ ადამიანად, როგორიც დღეს ვარ. სიმართლე ისაა, რომ ვიცი, ჯერ კიდევ ბევრი რამ მაქვს სასწავლი და დარწმუნებული ვარ, ჩემი საუკეთესო ნამუშევარი, ალბათ, ჯერ კიდევ წინ არის“.
ნახეთ, როგორ აღნიშნა Rosalia-მ 2027 წლის გრემის ნომინანტად დასახელება: