მომღერალმა სადებიუტო სოლო ალბომი 2018 წელს ჩაწერა სახელწოდებით „ეგზისტენციალური ცდომილებები“.
VAQO–ს ძირითადი მუსიკალური მიმდინარეობა ინდი ელემენტებით გაჯერებული ფსიქოდელიური როკია, თუმცა ძნელია მისი შემოქმედება ერთ კონკრეტულ მუსიკალურ ჟანრს მიაკუთვნო.
არტისტი ამჟამად ორ ლეიბლთან თანამშრომლობს: თურქულ ლეიბლ Tarla Records-თან, სადაც ალბომი “Ah Qo” (ო, დიახ!) გამოუშვა და ავსტრიულ ლეიბლ Studio hundert-თან, იქ მუსიკოსმა ალბომი “The Land of Kartvelians“ გამოსცა.
VAQO-ს მოსმენის დროს კონცეპტუალურ საქართველოში მოგზაურობ, იმ საქართველოში, სადაც შეიძლება ჯერ არც კი ყოფილხართ. მუსიკოსი მისი შემოქმედებით ხშირად სოციალურ-პოლიტიკურ საკითხებს ეხება, რომელიც დღევანდელ რეალობაში მძაფრი და აქტუალურია.
„გამარჯობა, მე ვახტანგ ქანთარია ვარ, უნდა გამომყვეთ, მე მაქვს გიტარა, ის ნამდვილია, ვიცი გიტარა როგორ მუშაობს. ექვსი სიმი აქვს, პირველი სიმი ემსახურება ხმამაღალი იდეების გახმოვანებას, მეორე სიმი ეხმარება იყოს სოლიდური, ერთადაც კი მოძრაობენ, მესამე და მეოთხე სიმები ცდილობენ რბილად დაუკავშირდნენ მეხუთე და მეექვსე სიმს, ეს უკანასკნელნი იმაზე სერიოზულნი არიან, ვიდრე წარმოდგენაში გაქვთ დანახული, უბრალოდ დაიმახსოვრეთ, მეექვსე სიმი ქმნის ფუნდამენტს. ჩვენ ქვეყანას მესამე და მეოთხე სიმი გამწყდარი აქვს, პირველი სიმი კი, სამი ცალი აქვს დაყენებული, ოთხიც კი… მეექვსე სიმი კი, ერთადერთი სიმია რისი გაწყვეტაც სურთ მაკრატელ შეიარაღებულ ხალხს. ისინი გადამთიელნი არიან, დიდი რაოდენობის მაკრატელი აქვთ ნაწარმოები. აქამდე წარმატებით გაწყვიტეს სხვადასხვა ქვეყნის სიმები, ისტორიული გამოცდილება აქვთ. იცოდეთ ისიც, რომ პირველი სიმი ყველაზე ადრე წყდება, მალე ამთავრებს არსებობას, ისინი ზედმეტად ხმამაღალნი და სუსტები არიან იმისთვის, რომ დიდხანს იხმაურონ. იცოდით? ქვეყანა ინსტრუმენტია, ჩვენ ჩვენს გიტარას არ ვაწყობთ, ველოდებით სხვა როდის აგვიწყობს, ჩვენ მანამდე ფანდური და ჩონგური გამოვიგონეთ, ამას ცოტა სხვა წყობა აქვს. მი, სი, სოლ, რე, ლა, მი, გასწორდება, უკვე ჟღერს, მზად იყავით. მე ჩემი გიტარა თქვენთვის ავაწყე, მე ვახტანგ ქანთარია ვარ”. – წერს მუსიკოსი ოფიციალურ Youtube არხზე, მისი ალბომის, „LIVE IN TBILISI-ს“ გამოშვების დროს.
„კონცერტი სოხუმში“ – Live in Sokhumi III ტრილოგიის დასკვნითი ნაწილია, რომელიც სხვადასხვა კლუბებში და სტუდიებში ჩაწერილ ნაშრომებს აერთიანებს. ალბომების ციკლის პირველი და მეორე ნაწილი 2021 წელს გამოვიდა, სახელწოდებით: „LIVE IN TBILISI“ და „LIVE IN TBILISI II“.
VAQO-ს შემოქმედება ქართული რეალობისთვის ზედმეტად ნამდვილია. ექსცენტრული, პროზად ქცეული ტექსტები და გამორჩეულად ინდივიდუალური სტილი, მსმენელის მეხსიერებაში მკაფიოდ ილექება.
„Live in სერიები იყო თბილისის, სოლოლაკის კლუბებში ჩაწერილი გამოსვლები, რომელიც შემდეგ „გასტუდიურდა“, დაემატა ახალი სიმღერები. ეს იყო თბილისური კლუბური ცხოვრების მუსიკალური ასახვის მცდელობაც. თუმცა, მისტიფიკაციის ელემენტებით, ტაშის რაოდენობის ზრდით მაგალითად, რამდენიმე ინსტრუმენტის დამატებით. კონცეპტუალურად მსურდა ქართულ ენოვანი მუსიკის შექმნა, რომელიც დაფუძნებული იქნებოდა მძიმე რიტმულ სექციაზე, ბლუზის, თანამედროვე ქანთრისა და ადგილობრივი ფოლკლორის ელემენტებით, მაღალი ვოკალური დატვირთვით.
უშუალოდ „Live in Sokhumi III“ ალტერნატიული საქართველოა, სადაც ოკუპაცია არ მომხდარა. მესიჯი მარტივია, რომ არა ომი, დღეს დაჯდებოდი მატარებელზე, 6 საათში უკვე ქალაქ სოხუმის ბარათაშვილის სარკინიგზო სადგურზე კონცერტს ჩაატარებდი. სამწუხაროა ის, რაც ომმა მოიტანა. ბოროტებას არ აქვს გამართლება. ოცდამეერთე საუკუნეში ოკუპაციის ადგილი არაა.” – აღნიშნა VAQO-მ ბილბორდთან საუბრისას.
მოისმინეთ არტისტის უახლესი ალბომი – Live in Sokhumi III
