Mattel-ის სახელგანთქმული სათამაშოს, ბარბის შესახებ გადაღებული მხატვრული ფილმის პირველი ტრეილერი გამოქვეყნდა. ფილმის რეჟისორი და სცენარის თანაავტორი გრეტა გერვიგია. ტრეილერი სტენლი კუბრიკის 1968 წლის საკულტო ფილმით, სახელწოდებით 2001: A Space Odyssey, არის შთაგონებული.
ბარბის როლს მარგო რობი ასრულებს, მას პარტნიორობას კი რაიან გოსლინგი უწევს. გოსლინგი ბარბის მუდმივი თანამგზავრის, კენის გმირს განასახიერებს. გადასაღები მოედნიდან გავრცელებული კადრების მიხედვით, ცხადი იყო, რომ გრეტა გერვიგმა ორიენტირი კიტჩისა და გადატვირთული ვიზუალისაკენ აიღო. გავრცელებულმა ტრეილერმა კი ეს საბოლოოდ დაამტკიცა.
ვიდეოს დასაწყისში, უდაბნოს პეიზაჟების ფონზე მთხროლების ხმა ისმის – „ოდითგანვე, იმ დროიდან, როცა პირველი გოგონა არსებობდა, არსებობდნენ… თოჯინებიც. თუმცა ეს თოჯინები ყოველთვის ბავშვი თოჯინები იყვნენ…მანამ, სანამ…” – სწორედ ამ მომენტში, კადრში გიგანტური ბარბი ჩნდება. ტრეილერში სიუჟეტის განვითარების პარალელურად, კუბრიკის ფილმის საუნდტრეკი, შტრაუსის კომპოზიცია – „ასე იტყოდა ზარატუსტრა“ ჟღერდება.
Barbie კინოგაქირავებაში 2023 წლის 21 თებერვალს ჩაეშვება. ფილმში ასევე მონაწილეობენ ამერიკა ფერერა, სიმუ ლიუ, კეიტ მაკინონი, ალექსანდრა შიპი, კინგსლი ბენ-ადირი, ისა რეი, რია პერლმენი და უილ ფერელი. ფარელი ბარბის მწარმოებელი კომპანია Mattel-ის აღმასრულებელი ხელმძღვანელის როლს ასრულებს.
ნახეთ Barbie-ის პირველი ტრეილერი:
