თანამედროვე ხელოვნების სცენაზე ახალი მულტიდისციპლინარული პლატფორმა Screen Sounds გამოჩნდა, რომელიც კინოსა და მუსიკალურ ექსპერიმენტებს ერთ შემოქმედებით სივრცეში აერთიანებს. პროექტის მთავარი იდეა მუნჯი კინოსა და ანიმაციის გაცოცხლებაა, სადაც ეკრანზე მიმდინარე გამოსახულება ცოცხალ მუსიკალურ იმპროვიზაციასთან ერთად უნიკალურ აუდიოვიზუალურ გამოცდილებად გარდაიქმნება.
პროგრამა ახალი მუსიკალური ინტერპრეტაციით აერთიანებს სპეციალურად Screen Sounds-ისთვის შექმნილ მუნჯ ფილმებსა და ანიმაციებს, ასევე უკვე არსებულ ნამუშევრებს.
პროექტის მთავარი ხიბლი მისი განუმეორებლობაა – ყოველი ჩვენება ერთჯერადი და ექსკლუზიურია. ფილმებს ტრადიციული საუნდტრეკის ნაცვლად ცოცხალი მუსიკა ახლავს. თითოეული ჩვენების დროს მოწვეული მუსიკოსები ეკრანზე განვითარებულ ამბავს ექსპერიმენტული იმპროვიზაციით გვიყვებიან. ცოცხალი აკომპანემენტი ფილმს ყოველ ჯერზე განსხვავებულ რიტმს, დინამიკასა და ატმოსფეროს სძენს.
სწორედ ცოცხალი შესრულება განსაზღვრავს პროექტის ერთ-ერთ მთავარ თავისებურებას, სადაც არც ერთი ჩვენება ერთმანეთს არ ჰგავს. შესაბამისად, ერთი და იგივე ფილმი სხვადასხვა ჩვენებაზე სრულიად განსხვავებულ გამოცდილებად შეიძლება იქცეს.
პლატფორმა რეჟისორებს, ვიზუალურ ხელოვანებსა და მუსიკოსებს საერთო შემოქმედებითი ექსპერიმენტისთვის აერთიანებს, სადაც გამოსახულება და ხმა წინასწარ განსაზღვრულ ჩარჩოებს სცდება და იმპროვიზაციას ეფუძნება.
პროექტი თეატრ „ჰარაკთან“ თანამშრომლობით ხორციელდება, რომლის სივრცეშიც Screen Sounds-ის ჩვენებები პერიოდულად გაიმართება.
20 სექტემბერს, 20:00 საათზე, თეატრ „ჰარაკში“ Screen Sounds-ის მორიგი ჩვენება გაიმართება. პროგრამაში წარმოდგენილი იქნება ოთხი ნამუშევარი: ნატო ბაგრატიონისა და სოფო კობიძის SCHULTZ AND YASHIN SPRING ADVENTURE და MARCH MEETS APRIL, ნანუკა კუტიბაშვილის JAVAKHETI და თათა მანაგაძის მოკლემეტრაჟიანი ანიმაციური ფილმი LIGHTS, HAZE. ფილმების ექსპერიმენტულ მუსიკალურ გახმოვანებას ცოცხლად, ჩვენების მიმდინარეობისას, VAZHMARR, ანუკა ყიფშიძე და თაზო მეიფარიანი შეასრულებენ.
Screen Sounds ცოცხალი შემოქმედებითი პროცესია, სადაც მუნჯი კინო თანამედროვე ხელოვნების აქტუალურ ენად გარდაიქმნება, ეკრანზე მიმდინარე გამოსახულება კი ცოცხალ მუსიკალურ იმპროვიზაციასთან ერთად ერთგვარ დიალოგს ქმნის, ეს არის პროექტი, სადაც კინო, მუსიკა და ექსპერიმენტული ხელოვნება ერთ მთლიან სივრცეს ქმნის.
ბილეთების შეძენა შესაძლებელია Biletebi.ge-ის პლატფორმაზე.
