ლონდონში მდებარე „მადამ ტიუსოს“ მუზეუმში ვარსკვლავების ცვილის ფიგურებს შორის, Drake-ის სკულპტურაც გამოჩნდა. ლონდონის ფილიალი „მადამ ტიუსოს“ მუზეუმის ბრენდის ძირითადი და ყველაზე დიდი სივრცეა. ეს მუზეუმი აერთიანებს ისეთი ცნობილი ადამიანების ფიგურებს, როგორებიც არიან: რიანა, არიანა გრანდე, მაილი საირუსი, ბიონსე და სხვები.
ცვილის ფიგურის ჩაცმულობის დიზაინი იმ სამოსით არის შთაგონებული, რომლითაც რეპერი 2021 წელს, Wireless Festival-ზე ყველასათვის მოულოდნელად გამოჩნდა. სკულპტურაზე არტისტის გარეგნობისათვის დამახასიათებელი ყველა დეტალი ზედმიწევნით ზუსტად არის გადატანილი, მათ შორის – ტატუები, პირსინგები, ვარცხნილობა და ასე შემდეგ. როგორც „მადამ ტიუსოს“ მუზეუმის წარმომადგენლები აღნიშნავენ, ცვილის ფიგურას Cartier-ისა და Van Cleef-ის აქსესუარების რეპლიკები უკეთია.
„ლონდონის მიმართ სიყვარული Drake-მა არაერთხელ გამოხატა. ამის მაგალითია შემთხვევა, როცა Wireless Festival-ზე მოულოდნელად გამოჩნდა.“ – წერია „მადამ ტიუსოს“ მუზეუმის ოფიციალურ განცხადებაში. აღსანიშნავია, რომ მედიაში გავრცელებული ცნობით, ჰიპ-ჰოპ არტისტმა ლონდონში სახლი იყიდა და ინგლისის დედაქალაქში ის დროს უფრო ხშირად გაატარებს. „გვინდა, ჩვენი ქალაქის ქუჩებში თბილად დავხვდეთ და ვაჩვენოთ, რომ ამ სიყვარულის საპასუხოდ, მისი უკვდავყოფა ამ ღირსშესანიშნავ სივრცეში შეგვიძლია.“ – თქვა ლონდონის „მადამ ტიუსოს“ მუზეუმის გენერალურმა მენეჯერმა, ტიმ უოტერსმა.
