ჰარი სტაილსის მუსიკალურმა ვიდეომ As It Was YouTube-ზე მილიარდ ნახვას მიაღწია.
2022 წელს ტანუ მუინოს რეჟისორობით გადაღებულმა კლიპმა ეს ნიშნული ცოტა ხნის წინ გადალახა. As It Was სტაილსის რიგით მეორე მუსიკალური ვიდეოა, რომელიც YouTube-ის მილიარდ ნახვათა კლუბს შეუერთდა. მანამდე კი ამ ნიშნულს 2017 წელს გამოსულმა სიმღერამ, Sign of the Times-მა მიაღწია.
As It Was, რომელიც არტისტის მესამე სტუდიური ალბომის, Harry’s House-ის წამყვანი სინგლია, პოპვარსკვლავის დღემდე უდიდეს ჰიტად რჩება. მან Billboard Hot 100-ის პირველ ადგილზე 15 კვირა დაჰყო. შედარებისთვის, ჩარტის პირველ პოზიციაზე ამაზე მეტხანს მხოლოდ შვიდი სიმღერაა გასული. ამავე პერიოდში As It Was 15 კვირის განმავლობაში Billboard Global 200-შიც ლიდერობდა.
Harry’s House-მა 2023 წლის გრემის დაჯილდოებაზე წლის ალბომის კატეგორიაში გაიმარჯვა და Billboard 200-ის ჩარტში ორი კვირის განმავლობაში პირველ ადგილს იკავებდა.
As It Was 2022 წლის MTV Video Music Awards-ზე წლის ვიდეოს კატეგორიაში იყო ნომინირებული, თუმცა ჯილდო მაშინ ტეილორ სვიფტის All Too Well (10 Minute Version)-ის მოკლემეტრაჟიან ფილმს ერგო.
სტაილსი ამჟამად უკვე მეოთხე ალბომის, Kiss All the Time. Disco, Occasionally-ს მხარდამჭერ ტურნეში იმყოფება. ამსტერდამში, ლონდონში, სან-პაულუსა და მეხიკოში გამართული კონცერტების შემდეგ, One Direction-ის ყოფილი წევრი ნიუ-იორკში, Madison Square Garden-ზე დაგეგმილი 30-კონცერტიანი რეზიდენციის შუა ეტაპს უახლოვდება.
სტაილსმა ცოტა ხნის წინ ტურნეს 2027 წლის აგვისტომდე გაგრძელება დააანონსა და სექტემბრის დასაწყისში დამატებითი კონცერტების სერიის თარიღებიც გამოაქვეყნა. ამავე დროს არტისტმა გულშემატკივრებს გაუზიარა: „ამის შემდეგ არ ვიცი, რა იქნება, მაგრამ ვიცი, რომ მოუთმენლად ველი ამის გაგებას“.
ნახეთ As It Was-ის მუსიკალური ვიდეო:
