ჯგუფმა RAVICI სადებიუტო EP გამოსცა, სახელწოდებით Arm The Homeless. ჩანაწერი ხუთ სიმღერას მოიცავს, რომლებიც საერთო თემების გარშემო ერთიანდება: ძალაუფლება, კონტროლი, ძალადობა, სოციალური გარემო და რეალობა, რომელშიც ადამიანები ყოველდღიურად ცხოვრობენ. ჯგუფი ამ საკითხებზე სიმღერებში საკმაოდ პირდაპირი და მძიმე ენით საუბრობს. „ამ თვალსაზრისით Arm The Homeless მხოლოდ სადებიუტო EP არ არის – ის ჯგუფის პირველი სრულფასოვანი განაცხადია იმ გარემოზე, რომელშიც თავადვე ცხოვრობს და მოქმედებს,” – ამბობენ RAVICI-ს წევრები.
ჟანრობრივად ალბომი მეტალს, პანკს, ინდუსტრიულ და ელექტრონულ ელემენტებს აერთიანებს, რაც საბოლოოდ ერთ, ჯგუფისთვის ბუნებრივ ჟღერადობად იკვრება.
რამდენიმე მნიშვნელობას აერთიანებს პროექტის სახელწოდებაც. ერთი მხრივ, ის პირდაპირი მოწოდებაა – „შეაიარაღე უსახლკარო, უუფლებო ადამიანები, რომელთაც საკუთარი ხმის გამოყენების შესაძლებლობა აღარ აქვთ”. თუმცა, მუსიკოსების თქმით, „უსახლკარო” აქ მხოლოდ პირდაპირი მნიშვნელობით არ იგულისხმება. ამ სიტყვაში მოიაზრებიან ადამიანები, რომლებმაც ქვეყანაში მიმდინარე პროცესების გამო საკუთარი სახლი, ქვეყანა ან მასთან კავშირის განცდა დაკარგეს. ასევე ისინიც, ვინც ქვეყანასა და საზოგადოებასთან კავშირი საკუთარი ინტერესების გამო დაკარგა.
„საბოლოოდ, ვის ‘შეაიარაღებს’ მსმენელი და ვის მისცემს უფლებას, გადაწყვიტოს საზოგადოებისა და ქვეყნის ბედი, ეს უკვე თავად მსმენელის გადასაწყვეტია.”
ჩანაწერზე მუშაობა ოთხი თვის განმავლობაში მიმდინარეობდა. რამდენიმე სიმღერა სწორედ ამ პერიოდში დაიწერა, შეიცვალა უკვე არსებული ზოგიერთი იდეაც. შესაბამისად, როგორც მუსიკოსები ამბობენ, ალბომში ერთგვარი სპონტანურობა და დაუგეგმავობა დარჩა, რაც მნიშვნელოვანი ფაქტორი აღმოჩნდა მისი საბოლოო ჟღერადობისთვის. საავტორო კომპოზიციებთან ერთად EP-ში ასევე შედის რობი კუხიანიძის სიმღერის, „ტაიას” RAVICI-სეული ქავერიც.
მოუსმინეთ ალბომს Arm The Homeless:
