ცნობილი ინგლისური როკ ჯგუფი Muse უკრაინის მხარდასაჭერად კონცერტებს გამართავს. მათი მიზანი ომით მოცული ქვეყნის დასახმარებლად მომუშავე საერთაშორისო არასამთავრობო ორგანიზაციებისთვის ფულადი სახსრების შეგროვება იქნება.
We’re honoured to be able to play these shows over two nights for three outstanding organisations. They're out there delivering vital services time after time for the most vulnerable people in society, both in the UK and abroad. Tickets on sale Wed 9am BST https://t.co/6xLVVMtql4 pic.twitter.com/zeoOhtoMF1
— muse (@muse) March 28, 2022
კოლექტივის კონცერტები 9 და 10 მაისს ლონდონში მდებარე დარბაზში Eventim Apollo არის დაგეგმილი, რომელიც 5000 ადამიანს იტევს. პირველი ღონისძიებიდან შემოსული თანხა ორგანიზაციას War Child გადაეცემა, რომელიც ომისგან დაზარალებულ ბავშვებსა და ახალგაზრდებს ეხმარება. მეორე საღამოდან მიღებული შემოსავალი კი Doctors Without Borders-ს გადაერიცხება, რომელიც საბრძოლო მოქმედებების ზონაში მყოფ ადამიანებს სამედიცინო დახმარებას უწევს.
Muse საქველმოქმედო შოუებით იმ არტისტების მზარდ სიას უერთდება, რომლებიც უკრაინის მოქალაქეებს უჭერენ მხარს. ახლახან კონცერტები გამართეს კანადურმა ინდი როკ ბენდმა Arcade Fire და ბრიტანულმა ნიუ ვეივ ჯგუფმა Duran Duran. 29 მარტს კი ბირმინგემში ღონისძიების Concert for Ukraine ფარგლებში დაგეგმილია ედ შირანის, კამილა კაბეიოს, Snow Patrol-ისა და სხვების გამოსვლები.
• ჯგუფმა Duran Duran უკრაინის მხარდასაჭერად კონცერტი გამართა
Muse ინგლისში, დევონის საგრაფოში 1994 წელს ჩამოყალიბდა. ჯგუფს მსოფლიო მასშტაბით 30 მილიონზე მეტი ალბომი აქვს გაყიდული. კოლექტივმა გრემის ჯილდოს მოპოვება ორჯერ მოახერხა. არტისტებს ამ დრომდე 8 სტუდიური ჩანაწერი აქვთ გამოცემული. რიგით მეცხრე ნამუშევარს კოლექტივი 26 აგვისტოს გაავრცელებს.
