მაილი საირუსი პირველ ლაივ ალბომს Attention: Miley Live აანონსებს

28 მარტი, 2022

ფოტო: Kevin Mazur/Getty Images

29 წლის ამერიკელი პოპვარსკვლავი, მაილი საირუსი ლაივ ჩანაწერს Attention: Miley Live აანონსებს, რომელიც გაყიდვაში 1 აპრილს ჩაეშვება. 20-ტრეკიან ნამუშევარში ახალი სიმღერები: Attention და You, ასევე, ბილბორდის ცხელი ასეულის ჰიტები: Party In The U.S.A., The Climb, Wrecking Ball და We Can’t Stop იქნება წარმოდგენილი.

• მაილი საირუსი ფანებს: ჩემი საუკეთესო მეგობრები თქვენ ხართ

“დიდი ხანია, ჩემი თაყვანისმცემლები ლაივ ალბომს მთხოვენ და ძალიან მიხარია, რომ სურვილს ვუსრულებ”, – წერს მაილი ტვიტერზე და ჩანაწერის ტრეილერს ავრცელებს.

🚨 #ATTENTION #MILEYLIVE 🚨 My fans have been asking me for a live album for a long time & I am so exxxited to give it to them! This show was curated BY the fans FOR the fans! pic.twitter.com/ahxYvOgLoN

— Miley Cyrus (@MileyCyrus) March 27, 2022

ალბომში შესული მუსიკა მიმდინარე წლის თებერვალში ლოს ანჯელესში, Crypto.com-ის არენაზე, Bud Light Super Bowl Music Fest-ის ფარგლებში გამართულ კონცერტზე ჩაიწერა.

“შოუზე დამსწრე აუდიტორიას ვთხოვე, შეერჩიათ სიმღერები, რომლებსაც შევასრულებდი. ასე რომ, ეს თქვენი შექმნილი სეტლისტია. ფანების რჩეული ქავერები, ძველი და ახალი სიმღერები, გამოუცემელი You და Attention”, – აღნიშნა მუსიკოსმა.

საირუსმა ლაივ ჩანაწერი თავდაპირველად ბრაზილიაში გამართულ Lollapalooza-ს ფესტივალზე გამოსვლისას დააანონსა. კონცერტი კი როკ ჯგუფ Foo Fighters-ის გარდაცვლილ დრამერს, ტეილორ ჰოკინსს მიუძღვნა.

იხილეთ ლაივ ალბომის ტრეკლისტი:

1. Attention
2. We Can’t Stop X Where Is My Mind?
3. Plastic Hearts
4. Heart of Glass
5. 4×4
6. (SMS) Bangerz
7. Dooo It!
8. 23
9. Never Be Me
10. Maybe
11. 7 Things
12. Bang Bang X See You Again
13. Jolene
14. High
15. You
16. Like a Prayer
17. Edge of Midnight (Midnight Sky Remix)
18. The Climb
19. Wrecking Ball X Nothing Compares 2 U
20. Party In The U.S.A.

თავისი ბოლო, როკის ელემენტებით გაჯერებული ნამუშევარი Plastic Hearts ამერიკელმა შემსრულებელმა 2020 წელს გამოაქვეყნა. მას ბილბორდის როკ ალბომების ჩარტში პირველი პოზიცია ერგო. ცნობილია, რომ მაილი ამჟამად კიდევ ერთ სტუდიურ ჩანაწერზე მუშაობს, რომელსაც ახალ ლეიბლზე Columbia Records გამოუშვებს.

მაილი საირუსმა სახელი ბავშვობაში დისნეის სერიალ “ჰანა მონტანაში” მონაწილეობით გაითქვა. თუმცა, ზრდასრულ ასაკში სამსახიობო კარიერას მუსიკალური მოღვაწეობა არჩია. მისი დისკოგრაფია 7 სტუდიურ ალბომს ითვლის, რომელთაგან ხუთი Billboard 200-ის საუკეთესო ხუთეულში მოხვდა. მაილი ერთადერთი ქალი მომღერალია, რომელმაც 21-ე საუკუნეში მსგავს წარმატებას მიაღწია. შემსრულებელი ძირითადად პოპ მუსიკას ქმნის, თუმცა ბოლო პერიოდში როკ კომპოზიციებსაც ხშირად ასრულებს. კარიერის განმავლობაში არტისტს 23 მილიონზე მეტი ალბომი აქვს გაყიდული.