ბრიტნი სპირსი: სელენა გომესმა ახალი ტატუს გაკეთება შთამაგონა

1 აპრილი, 2022

ფოტო: Michelangelo Di Battista/GI

ამერიკელმა პოპვარსკვლავმა ბრიტნი სპირსმა სოციალურ ქსელ ინსტაგრამზე კოლეგის, სელენა გომესის ფოტოსურათი გააზიარა, რომელშიც ეს უკანასკნელი ახალი სვირინგითაა აღბეჭდილი.

“ტატუები დიდად არ მიყვარს, მაგრამ ღმერთო… რა ლამაზია. სელენამ კიდევ ერთი ნახატის გაკეთება შთამაგონა”, – აღნიშნავს ბრიტნი პოსტის აღწერის გრაფაში. სელენა კი კომენტარების ველში პასუხობს: “მიყვარხარ სამუდამოდ”.

View this post on Instagram

A post shared by Britney Spears (@britneyspears)

სპირსს სხეულზე არაერთი ტატუ აქვს ამოსვირინგებული, რომლებიც ხშირად ჩანს მომღერლის მიერ სოციალურ ქსელებში გავრცელებულ საცეკვაო ვიდეოებში.

სელენა გომესმა თავისი ახალი ტატუს შესახებ გადაცემაში Live With Kelly and Ryan სტუმრობისას ისაუბრა:

“მას სხვადასხვა მნიშვნელობა აქვს. კარა დელევინი, რომელთანაც, მგონი, 16 წლიდან ვმეგობრობ, დღემდე ვარდის კოკორს მეძახის. უკვე მეტსახელად მექცა და ამიტომ ყოველთვის მსურდა ვარდის ამოსვირინგება. გავიკეთე კიდეც და ძალიან მომწონს”.

ბრიტნი სპირსმა შემოქმედებითი მოღვაწეობა 1992 წელს დაიწყო. მუსიკოსმა პირველი ორი კომერციულად წარმატებული ალბომით ყველა დროის ყველაზე გაყიდვადი თინეიჯერის სტატუსი შეიძინა. შემსრულებლის ცხრა სტუდიური ჩანაწერიდან ექვსი Billboard 200-ის სათავეშია მოხვედრილი. გრემის მფლობელ მომღერალს 150 მილიონზე მეტი ჩანაწერი აქვს გაყიდული. ბრიტნის ჰოლივუდის დიდების ხეივანში ვარსკვლავიც გაუხსნეს.