ცნობილი ნიუ იორკელი რეპერი Cardi B საბავშვო ტელეარხ Nickelodeon-ის ანიმაციური სერიალის Baby Shark’s Big Show! მომავალი ეპიზოდის სტუმარი გახლავთ. ნაწყვეტი, რომელშიც მუსიკოსის პერსონაჟი Sharki B ბეიბი შარკსა და მის მეგობარ უილიამს საცეკვაო მოძრაობას სახელწოდებით The Seaweed Sway ასწავლის, გამოცემა “ბილბორდისთვის” ექსკლუზიურად გახდა ხელმისაწვდომი.
• ქარდი ბიმ ალბომით Invasion of Privacy კიდევ ერთი რეკორდი მოხსნა
სატელევიზიო შოუ Baby Shark’s Big Show! ცნობილ საბავშვო სიმღერას Baby Shark ეფუძნება. სერიალის პრემიერა 2020 წლის დეკემბერში შედგა. აღსანიშნავია, რომ ბეიბი შარკის ფილმზეც მუშაობენ, რომელიც კინოგაქირავებაში 2023 წელს ჩაეშვება.
ნიუ იორკელმა ბელქალის ალმანზარმა, ფსევდონიმით Cardi B, შემოქმედებითი მოღვაწეობა 2015 წელს დაიწყო. 2017 წელს მან ჰიტი Bodack Yellow გამოუშვა, რომელმაც ბილბორდის ცხელი ასეულის სათავეში ზედიზედ სამი კვირა დაჰყო. 19 წლის განმავლობაში ეს იყო პირველი შემთხვევა, როდესაც ქალი რეპერის სოლო ჩანაწერი ჰიტ აღლუმის წამყვან პოზიციაზე გავიდა. სინგლი ბრილიანტის სტატუსის მფლობელიც გახდა, რამაც ქარდი ამ მიღწევის მქონე პირველ ქალ რეპერად აქცია. 2019 წელს მუსიკოსის სამმაგი პლატინის მფლობელმა სადებიუტო ჩანაწერმა Invasion Of Privacy გრემის დაჯილდოებაზე “წლის საუკეთესო ჰიპ ჰოპ ალბომის” კატეგორიაში გაიმარჯვა. ეს იყო პირველი შემთხვევა, როდესაც ქალმა სოლო არტისტმა აღნიშნული ნომინაცია მოიგო.
