მიმდინარე წლის 16 აპრილს კალიფორნიაში გამართულ ფესტივალ Coachella-ზე ჰიპ ჰოპ არტისტ Megan Thee Stallion-ის გამოსვლამ ჩინელ ცენზორებს თავის ტკივილი გაუჩინა. ღონისძიების ტრანსლაცია ქვეყნის მკაცრი მორალური რეგულაციების დამსახურებით აკრძალული იყო, ამიტომაც შოუს ყურებასა და სხვებისთვის ჩვენებას მსურველები ე.წ. VPN სერვისის საშუალებით ახერხებდნენ.
სოციალური მედიის მონიტორინგის ვებგვერდმა What’s On Weibo შენიშნა, რომ პლატფორმა WeChat-ზე “კოაჩელა” ლაივ სტრიმინგით უკანონოდ გადაიცემოდა, რის შემდეგაც პასუხისმგებელმა პირებმა ხელისუფლების მიერ დაწესებული შეზღუდვების აღსასრულებლად შოუს დაცენზურება დაიწყეს.
ერთ-ერთ ცენზორს საზოგადოებისთვის საჩვენებლად შეუფერებელი კადრების დაფარვა შავი გამოსახულებით დაევალა. მისთვის განსაკუთრებით რთული აღმოჩნდა მუშაობა რეპერის მიერ ჰიტის WAP შესრულებისას, რადგანაც მოცეკვავეები და მეგანი მოშიშვლებული სამოსით ცეკვავდნენ. ამასთან, კომპოზიციის ტექსტიც სექსუალური ხასიათისაა.
ტრანსლაციის მაყურებლები მონიტორინგის სამსახურს კომენტარების ველში უწერდნენ, რომ ნუ ექცეოდნენ მათ, როგორც ბავშვებს. ზოგიერთი მათგანი კი ხუმრობდა, რომ რეალურად ტრეკს Wet Ass Puxi ერქვა და შანხაის ერთ-ერთ რაიონ Puxi-ს შეეხებოდა, სადაც ამჟამად ომიკრონის გამო მკაცრი ლოქდაუნია გამოცხადებული.
Coachella is also being livestreamed via WeChat. Apparently, this performance not only made censors sweat, everyone was also joking that they're singing a song about Shanghai Puxi District. #MeganTheeStallion #Shanghailockdown pic.twitter.com/2ltSqzFC9c
— Manya Koetse (@manyapan) April 17, 2022
