ბრონქსელი ჰიპ ჰოპ არტისტი Pusha T რიგით მეოთხე სტუდიურ ალბომს It’s Almost Dry პარასკევს, 22 აპრილს გამოუშვებს. ნამუშევრის აღმასრულებელი პროდიუსერები ქანიე ვესთი და ფარელ უილიამსი არიან. ჩანაწერი მოიცავს ჯეი ზისთან ერთად შექმნილ ახლახან გავრცელებულ ტრეკს Neck & Wrist, ასევე სინგლს Diet Coke.
სტუდიური ნამუშევარი 12 ტრეკისგან შედგება, მათ შორის კოლაბორაციული ჩანაწერებისგან ისეთ არტისტებთან, როგორებიც არიან: ქანიე ვესთი, ჯეი ზი, ქიდ ქადი, ლაბირინთი და სხვები. ფუშამ ინსტაგრამზე ალბომის გარეკანი და ტრეკლისტი გამოაქვეყნა.
ამასთან, ცნობილია, რომ ფუშა ნამუშევრის პრომოუშენის ფარგლებში ამერიკულ ტურნეს 29 მაისს დაიწყებს.
ტერენს თორნტონმა, ფსევდონიმით Pusha T, შემოქმედებითი მოღვაწეობა 1993 წელს დაიწყო. ჯგუფი Clipse, რომელიც 2000-იანებში საკმაოდ პოპულარული გახლდათ, მან უფროს ძმასთან ერთად ჩამოაყალიბა. პროექტის პირველი სტუდიური ნამუშევარი Lord Willin’ კომერციულად მომგებიანი გამოდგა და ოქროს სტატუსიც მოიპოვა. ჰიპ ჰოპ დუეტის ასეთი წარმატება ლეგენდარული მუსიკოსის, ფარელ უილიამსის დამსახურებაცაა, რომელთანაც “ქლიფსმა” არაერთხელ ითანამშრომლა.
2009 წელს რეპერმა შემოქმედებითი პაუზა აიღო, რის შემდეგაც მას ქანიე ვესთმა სოლო კარიერის დაწყება გადააწყვეტინა. 2011 წელს ფუშამ EP სახელწოდებით Fear Of God II: Let Us Pray გაავრცელა. თუმცა, მისი მთავარი წარმატება სადებიუტო ალბომს My Name Is My Name უკავშირდება. 2018 წელს ტერენსმა გაყიდვაში დღეისთვის ბოლო ალბომი Daytona ჩაუშვა, რომლის აღმასრულებელი პროდიუსერიც ქანიე ვესთი გახლავთ. სტუდიურმა ნამუშევარმა კრიტიკოსების მხრიდან დადებითი შეფასებები დაიმსახურა.
