19 წლის ამერიკელი მომღერალი, ოლივია როდრიგო ტურნეს Sour Tour ფარგლებში კანადის ქალაქ ტორონტოს ესტუმრა. Massey Hall-ში დაგეგმილ კონცერტზე, რომლის ყველა ბილეთი გაყიდული იყო, არტისტმა სცენაზე ცნობილი ადგილობრივი შემსრულებელი, ავრილ ლავინი მიიწვია და მასთან ერთად ამ უკანასკნელის 2002 წლის ჰიტი Complicated იმღერა.
ამის შემდეგ შავ ჩექმებსა და კუბოკრულ ქვედაბოლოებში გამოწყობილმა არტისტებმა Complicated შეასრულეს. ტრეკი, რომელსაც ბილბორდის ცხელ ასეულში მეორე ადგილი ერგო, ლავინის სადებიუტო ალბომში Let Go არის წარმოდგენილი.
კონცერტის დასრულების შემდგომ ავრილმა და ოლივიამ ერთმანეთს მადლობა სოციალური ქსელების მეშვეობით გადაუხადეს:
ავრილისა და ოლივიას სიმღერის პერფორმანსის ხილვა მოცემულ ბმულზე შეგიძლიათ. აღსანიშნავია, რომ როდრიგომ სიმღერა Complicated აპრილში დაწყებული ტურნეს Sour Tour ფარგლებში უკვე არაერთხელ შეასრულა.
ოლივია როდრიგო ახალგაზრდა მსახიობი და მუსიკოსია, რომელსაც პოპულარობა Disney Channel-ის სერიალებში Bizaardvark და High School Musical: The Musical: The Series შესრულებულმა მთავარმა როლებმა მოუტანა. 2021 წლის 8 იანვარს არტისტმა სადებიუტო კომპოზიცია Drivers License გამოაქვეყნა. სინგლმა მსოფლიოს სხვადასხვა ქვეყნის ჩარტებში, მათ შორის, აშშ-სა და დიდ ბრიტანეთში, პირველი ადგილის დაკავება მოახერხა. ამავე წელს ოლივიამ ალბომი Sour გამოუშვა, რომელმაც მას გრემის სამი ჯილდო მოუტანა.
ავრილ ლავინმა შემოქმედებითი მოღვაწეობა 1999 წელს დაიწყო. მისი სადებიუტო ალბომი Let Go 21-ე საუკუნეში კანადელი არტისტის მიერ გამოშვებული ყველაზე გაყიდვადი ჩანაწერია. შემსრულებლის დისკოგრაფია შვიდ სტუდიურ ნამუშევარს ითვლის. მას კარიერის განმავლობაში გრემის 8 ნომინაცია აქვს მიღებული. მუსიკოსს მსოფლიოში 40 მილიონზე მეტი ალბომი აქვს გაყიდული. მას განსაკუთრებული პოპულარობა სიმღერებმა Complicated, Girlfriend და Sk8er Boi მოუტანა.
