პოპულარული ნიუ იორკელი ჰიპ ჰოპ მუსიკოსი, რაკიმ მეიერსი, სასცენო სახელით ASAP Rocky, ახალი ნამუშევრის D.M.B. თიზერს ავრცელებს. 19-წამიანი ვიდეო რეპერისა და მისი შეყვარებულის, ბარბადოსელი მომღერლის, რიანას კადრებისგან შედგება. იმის მიუხედავად, რომ ეს უკანასკნელი ჩანაწერის გარეკანზეც გვხვდება, ჯერჯერობით უცნობია, მიიღებს თუ არა ნამუშევარში მონაწილეობას მოწვეული არტისტის რანგში.
აღსანიშნავია, რომ ორი კვირის წინ ეისეფ როქი ლოს ანჯელესის საერთაშორისო აეროპორტში დააკავეს. საქმე 2021 წლის ნოემბერში მომხდარ სავარაუდო სროლის ფაქტს ეხება. მუსიკოსი 550 000 აშშ დოლარის ოდენობის გირაოს გადახდის შემდეგ გაათავისუფლეს. სასამართლო სხდომა კი 17 აგვისტოს ჩაინიშნა.
ეისეფ როქიმ შემოქმედებითი მოღვაწეობა 2007 წელს დაიწყო. მუსიკოსის დისკოგრაფია კომერციულად წარმატებულ ალბომებს Long.Live.A$AP და At.Long.Last.A$AP მოიცავს, რომლებიც Billboard 200-ის ჩარტის სათავეში მოხვდნენ. 2018 წელს შემსრულებელმა დღეისათვის ბოლო, რიგით მესამე სტუდიური ჩანაწერი Testing გამოუშვა, რომელიც ოქროს სტატუსის მფლობელია. სოლო კარიერის გარდა, რეპერი გაერთიანება ASAP Mob-ის ერთ-ერთი ლიდერია.
