ცნობილი პუერტორიკოელი შემსრულებელი, ბედ ბანი რიგით მეხუთე სტუდიურ ალბომს Un Verano Sin Ti ავრცელებს. 23-ტრეკიანი ჩანაწერი, რომელშიც 2019 წლის ჰიტი Callaita შევიდა, Tainy-სა და MAG-ის პროდიუსირებით შეიქმნა.
სტუდიური ნამუშევრის ფარგლებში ბედ ბანიმ ითანამშრომლა ჩენჩო კორლეონესთან, ტონი დაიზთან, როუ ალეხანდროსა და ჯაიკოსთან, ასევე დუეტებთან: The Marias და Buscabulla. მან აგრეთვე კომპოზიცია ჩაწერა კოლუმბიურ ჯგუფთან Bomba Estereo.
Un Verano Sin Ti პირველი ალბომია 2019 წლის El Ultimo Tour Del Mundo-ს შემდეგ. ეს უკანასკნელი ისტორიაში პირველი სრულად ესპანურენოვანი ალბომი გახდა, რომელიც Billboard 200-ის სათავეში მოექცა.
ბენიტო მარტინეს ოკასიომ, ფსევდონიმით Bad Bunny, მოღვაწეობა 2015 წელს დაიწყო. მან უკვე მოასწრო თანამშრომლობა ისეთ პოპულარულ არტისტებთან, როგორებიც არიან Cardi B, J Balvin, Daddy Yankee და სხვები. აღსანიშნავია, რომ ქარდი ბისთან და კოლუმბიელ ჯეი ბალვინთან ერთად 2018 წელს ჩაწერილი კომპოზიცია I Like It ბილბორდის ჩარტში პირველობას 12 კვირის განმავლობაში არ თმობდა. ბანის სტუდიურმა ნამუშევრებმა YHLQMDLG და El Último Tour Del Mundo სხვადასხვა წელს საუკეთესო ლათინური/ურბანული ალბომის კატეგორიაში გრემის ჯილდოები დაიმსახურა.
