გასულ კვირას ამერიკელი პოპ მომღერლის, დემი ლოვატოს თაყვანისმცემლებმა ინფორმაცია გაავრცელეს, რომლის თანახმადაც მუსიკოსის მომავალი, რიგით მერვე ალბომის პირველი სინგლი Skin of My Teeth იქნებოდა, წყაროდ კი “the streets” დაასახელეს. “რა ქუჩა?”, – იკითხა სოციალური ქსელის ერთ-ერთმა მომხმარებელმა.
My Street
— Demi Lovato (@ddlovato) May 23, 2022
მომღერალმა ტვიტერის პოსტის სქრინშოთი ინსტაგრამზეც გააზიარა, თუმცა, სინგლის გავრცელების თარიღი არ გაუსაჯაროებია. 29 წლის შემსრულებელმა აპრილში აღნიშნა, რომ მომავალი ალბომი მის პერსონალურ აღმასვლებსა და დაღმასვლებზე მოგვითხრობს.
დემი ლოვატომ მუსიკალური კარიერა 2002 წელს დაიწყო. მისი წარმატება 2009 წელს გამოშვებულ რიგით მეორე სტუდიურ ალბომს Here We Go Again უკავშირდება, რომელიც Billboard 200-ის ჩარტის პირველ პოზიციაზე გავიდა და გაყიდვების ლიდერი გახდა. განსაკუთრებული პოპულარობა არტისტს სიმღერებმა Cool for the Summer, Sorry Not Sorry და Confident მოუტანა. დემის ამერიკის შეერთებულ შტატებში 24 მილიონი ჩანაწერი აქვს გაყიდული.
