მუსიკალური ინსტრუმენტების მწარმოებელმა Gibson Brands-მა კომპანია Dean Guitars-ის წინააღმდეგ სასამართლო დავა მოიგო. თუმცა, “გიბსონმა”, ნაფიცი მსაჯულების გადაწყვეტილებით, კომპენსაციის სახით მხოლოდ 4000 ამერიკული დოლარი მიიღო.
დოკუმენტების თანახმად, Dean Guitars-ის მშობელმა კომპანიამ Armadillo Enterprises თავისი ინსტრუმენტების შექმნისას Gibson-ის გიტარების რამდენიმე მოდელის, მათ შორის Flying V, Explorer, ES, SG და Dove Wing დიზაინის ელემენტები გამოიყენა, რომელთა სასაქონლო ნიშნები დაცული გახლავთ.
Dean Guitars კი თავის მხრივ ამტკიცებდა, რომ ეს დიზაინები უკვე იმდენად გავრცელებულია, რომ ყველას შეუძლია მათი გამოყენება. მსაჯულებმა დაადგინეს, რომ კომპანიამ “გიბსონის” გიტარების ასლების გაყიდვით სავაჭრო ნიშანი დაარღვია.
თუმცა, ნაფიცი მსაჯულების აზრით, “გიბსონი” ზედმეტად დიდი ხნის განმავლობაში ელოდა იმას, რომ Dean Guitars-ს რაც შეიძლება, მეტი მოდელის ასლი დაემზადებინა. ამასთან, მას ამ დარღვევებით მნიშვნელოვანი ზიანი არ მიუღია. ამიტომაც, კომპენსაციამ მხოლოდ 4000 აშშ დოლარი შეადგინა.
თანხის სიმცირის მიუხედავად, ეს გადაწყვეტილება იმას ნიშნავს, რომ Dean Guitars ვალდებული იქნება, ზემოხსენებული ინსტრუმენტების ასლების რეალიზაცია შეწყვიტოს. თუმცა, მანამდე ვერდიქტი სააპელაციო სასამართლოში გასაჩივრდება.
