პოპულარული ამერიკელი პროდიუსერის, ლელანდ უეინის, იგივე Metro Boomin-ის დედა, ლესლი ჯოან უეინი, სავარაუდოდ, ქმარმა მოკლა, რის შემდეგაც ამ უკანასკნელმა სიცოცხლე სუიციდით დაასრულა. ინფორმაციას ტაბლოიდი TMZ ავრცელებს. ახლო მომავალში ექსპერტიზაც ჩატარდება, რის შემდეგაც ქალის სიკვდილის მიზეზი ოფიციალურად გახდება ცნობილი.
“თიემზი” ასევე აღნიშნავს, რომ ლესლი უეინმა შვილები შტატ მისურის ქალაქ სენტ ლუისში გაზარდა და სწორედ მან წაახალისა მეთრო ბუმინი, რომ მუსიკალური მოღვაწეობა დაეწყო.
პროდიუსერი პირველად ბილბორდის არტისტების ჩარტში 2017 წელს გამოჩნდა, 2020 წელს კი მასში მეოთხე პოზიციაზე გავიდა. ის ცხელ ასეულში 31-ჯერ არის მოხვედრილი, ორჯერ ტოპ ათეულში კომპოზიციებით Runnin და Mr. Right Now.
მეთრო ბუმინმა შემოქმედებითი მოღვაწეობა 2009 წელს დაიწყო. დღემდე მუსიკოსმა სამი კოლაბორაციული ნამუშევარი გაავრცელა. პირველი მათგანი 21 Savage-თან ერთად შექმნილი EP სახელწოდებით Savage Mode გახლავთ, რომელმაც შემსრულებლებს საყოველთაო აღიარება მოუტანა. 2017 წელს არტისტებმა კვლავ ითანამშრომლეს. მათ ოფიციალური მიქსტეიპი Without Warning გამოაქვეყნეს, რომელშიც ატლანტური თრეფ გაერთიანების Migos წევრი, ოფსეტიც მონაწილეობს. რამდენიმე თვეში მეთრომ და დეტროიტელმა რეპერმა, ბიგ შონმა გაყიდვაში ალბომი Double Or Nothing ჩაუშვეს. მუსიკალური კარიერის განმავლობაში მან არაერთი ჰიტის ინსტრუმენტალი დაწერა, მათ შორის ფოსთ მელოუნის ბრილიანტის სტატუსის მქონე ტრეკის Congratulations. 2018 წლის ნოემბერში კი ბუმინმა სადებიუტო სოლო ალბომი Not All Heroes Wear Capes გამოსცა, რომელმაც პლატინის სტატუსი მალევე მოიპოვა და Billboard 200-ის სათავეშიც მოხვდა. 2020 წელს გაყიდვაში “სევიჯ მოუდის” მეორე ნაწილი ჩაეშვა.
