პოპვარსკვლავი ბრიტნი სპირსი და მისი პერსონალური მწვრთნელი, სემ ასგარი დაქორწინდნენ. გამოცემა People-ის ინფორმაციით, წყვილმა საქორწინო ცერემონია ლოს ანჯელესში გამართა და 60 სტუმარი მოიწვია, რომელთა შორისაც პერის ჰილტონი, დრიუ ბერიმორი და მადონა იყვნენ. მომღერალი კვარცხლბეკთან ელვის პრესლის სიმღერის Can’t Help Falling in Love ფონზე მივიდა.
• ბრიტნი სპირსმა 15 წლის ჯასტინ ბიბერთან შეხვედრა გაიხსენა
მუსიკოსმა დაგეგმილი ქორწილის შესახებ ჯერ კიდევ გასული წლის ნოემბერში ისაუბრა, როდესაც განაცხადა, რომ კაბას დონატელა ვერსაჩე უკერავდა. მიმდინარე წლის 8 მაისს კი მან ინსტაგრამზე ფოტო გამოაქვეყნა.
View this post on Instagram
ასგარიმ კი გაამხილა, რომ მან და ბრიტნიმ ქორწინების თარიღი დედის დღეს ჩანიშნეს.
სპირსი და ასგარი შარშან, სექტემბერში დაინიშნენ. მათ ერთმანეთი 2016 წელს კლიპის Slumber Party გადაღებებზე გაიცნეს. 2004 წელს ბრიტნი სკოლის მეგობარ ჯეისონ ალექსანდერზე დაქორწინდა, რომელსაც 55 საათში დაშორდა. არსებული ინფორმაციით, ჯეისონმა გუშინ ცერემონიის ჩაშლა სცადა. მომღერალი ასევე კევინ ფედერლაინზე იყო დაქორწინებული, რომელთანაც ორი ვაჟი, ჯეიდენი და შონი შეეძინა. წყვილი 2007 წელს განქორწინდა.
ბრიტნი სპირსმა შემოქმედებითი მოღვაწეობა 1992 წელს დაიწყო. მუსიკოსმა პირველი ორი კომერციულად წარმატებული ალბომით ყველა დროის ყველაზე გაყიდვადი თინეიჯერის სტატუსი შეიძინა. შემსრულებლის ცხრა სტუდიური ჩანაწერიდან ექვსი Billboard 200-ის სათავეშია მოხვედრილი. გრემის მფლობელ მომღერალს 150 მილიონზე მეტი ჩანაწერი აქვს გაყიდული. ბრიტნის ჰოლივუდის დიდების ხეივანში ვარსკვლავიც გაუხსნეს.
