10 დეკემბერს კინოთეატრ „ამირანში“ თბილისის 23-ე საერთაშორისო კინოფესტივალის დაჯილდოება ჩატარდა. მოწვეულმა ჟიურიმ გამარჯვებულები სხვადასხვა კატეგორიაში გამოავლინა. ფესტივალის მთავარი პრიზი რეჟისორ სოსო ბლიაძეს გადაეცა. ნამუშევარმა, სახელწოდებით „ჩემი ოთახი“, საუკეთესო სრულმეტრაჟიანი მხატვრული ფილმის ნომინაციაში გაიმარჯვა და „ოქროს პრომეთე“ დაიმსახურა. საუკეთესო მოკლემეტრაჟიანი ფილმის კატეგორიაში გამარჯვებულად კატალინა ბაქრაძის სარეჟისორო ნამუშევარი „ჩემი მეგობარი ანდრო“ დასახელდა. კოტე კალანდაძის ფილმმა „დრამერი“, სრულმეტრაჟიანი მხატვრული ფილმების კატეგორიაში განსაკუთრებული აღნიშვნა დაიმსახურა. მოკლემეტრაჟიანი მხატვრული ფილმების კატეგორიაში პირველი განსაკუთრებული აღნიშვნა მიიღო ლევან უჩანეიშვილის ფილმმა „აქსელი“, ხოლო მეორე განსაკუთრებული აღნიშვნა – მიხეილ კვირიკაძის სარეჟისორო ნამუშევარმა, „ქრისტე ჩიტი (ნათლობა იორდანეში)”.
გამარჯვებულები გამოვლინდნენ დოკუმენტური კინოს კატეგორიაშიც. Საუკეთესო სრულმეტრაჟიანი დოკუმენტური ფილმის ნომინაციაში „ოქროს პრომეთე“ რეჟისორ თეკლა ასლანიშვილს გადაეცა ნამუშევრისათვის „სახელმწიფო სახელმწიფოში“. მოკლემეტრაჟიან დოკუმენტურ ფილმების კატეგორიაში კი, ჟიურის რჩეულად ანა ჯეგნარაძის და მარიტა თევზაძის ნამუშევარი „ჰეი, გუნეშ!“დასახელდა. განსაკუთრებული აღნიშვნა გიორგი ვარსიმაშვილმა დაიმსახურა ფილმისათვის „მაინც ვითამაშებთ“.
ჟიურიმ ასევე სპეციალური პრიზის მფლობელი კინოსურათი დაასახელა. ეს ჯილდო უკრაინელი რეჟისორის, მარინა ერ გორბაჩის ფილმს, Klondike-ს გადაეცა.
„ადამიანის უფლებები კინოში“ თბილისის საერთაშორისო კინოფესტივალის ფარგლებში დაწესებული კიდევ ერთი სპეციალური პრიზია. ამ პრიზის მფლობელი იაპონელი რეჟისორი ჩი ჰაიაკავა გახდა, ფილმისათვის Plan 75.
აღსანიშნავია, რომ თბილისის 23-ე საერთაშორისო კინოფესტივალი განსაკუთრებით მრავალფეროვანი და დატვირთული პროგრამით გამოირჩეოდა. როგორც კინოფესტივალის გენერალურმა დირექტორმა, გაგა ჩხეიძემ Billboard Georgia-სთან საუბრისას თქვა, აუდიტორიის ჩართულობიდან გამომდინარე, წლევანდელი ფესტივალი წარმატებული აღმოჩნდა.
„წელს ჩვენ 100-მდე ფილმი ვაჩვენეთ. ქართული და უცხოური ფილმები სხვადასხვა სექციაში იყო წარმოდგენილი. აუდიტორიის ინტერესი საკმაოდ დიდი აღმოჩნდა, სეანსებზე დარბაზი სრულიად გავსებული იყო. ფესტივალს ესწრებოდა უამრავი აკრედიტებული სტუმარი – რეჟისორები, კინოინდუსტრიის სხვადასხვა პროფესიული წარმომადგენელი, პრესა. თბილისის 23-ე საერთაშორისო კინოფესტივალი შედარებით მცირე დაფინანსებით ჩატარდა. სამწუხაროდ, წელს ახალგაზრდა კინემატოგრაფებისთვის საკმარისი მოცულობით ვერ უზრუნველვყავით მასტერკლასები, ვორკშოპები, ტრენინგები, თუმცა, კინო ჩვენებების მხრივ, ტრადიციულად მაღალი სტანდარტი შევინარჩუნეთ. განსაკუთრებით მნიშვნელოვანია, რომ არაკომერციული, არტ-ჰაუს ფილმები მაყურებლამდე მივიდა, ამიტომაც შეგვიძლია ვთქვათ, რომ კინოფესტივალმა თავისი მისია შეასრულა.“ – აღნიშნა გაგა ჩხეიძემ.
აღსანიშნავია, რომ საერთაშორისო ჟიური სხვადასხვა ქვეყნის კინემატოგრაფიის გამორჩეული წარმომადგენლებით იყო დაკომპლექტებული. სხვა წლების მსგავსად, კინოფესტივალმა მოწვეული სტუმრების დადებითი შეფასებები დაიმსახურა.
წლევანდელი კინოფესტივალის ტრიუმფატორი ფილმის რეჟისორი სოსო ბლიაძე 2021 წლის გამარჯვებულიც არის. გასულ წელს ჟიურიმ საუკეთესო ფილმად „ოთარის სიკვდილი“ დაასახელა. რაც შეეხება მის ახალ ნამუშევარს „ჩემი ოთახი“, საკმაოდ წარმატებული აღმოჩნდა და არა ერთ საერთაშორისო კინოფესტივალზე სხვადასხვა ნომინაციაშიც გაიმარჯვა.
„თბილისის საერთაშორისო კინოფესტივალი ძალიან მიყვარს და ამ პრიზის მოპოვება ჩემთვის დიდი სიხარულია. ქართული კინო მრავალფეროვანი და საინტერესოა. აუცილებელია, პრესამ უფრო ხშირად ისაუბროს ჩვენი ქვეყნის თანამედროვე კინოზე, რათა მაყურებლები ამ ფილმების სანახავად დაბრუნდნენ კინოთეატრებში“ – სოსო ბლიაძე, კინორეჟისორი.
„ჩემი ოთახი“ ორი გოგოს ურთიერთობაზე ფოკუსირდება. გმირები სრულიად სხვადასხვა სოციუმს მიეკუთვნებიან. ერთმანეთისაგან განსხვავებული პერსონაჟების ურთიერთობა თანდათან ახლო კავშირად გარდაიქმნება. კინოსურათში ნაჩვენებია თანამედროვე საქართველოში ახალგაზრდების ყოველდღიურობა და პატრიარქალური შეხედულებების გავლენა მათ ცხოვრებაზე. ფილმში მთავარ როლებს თაკი მუმლაძე და მარიამ ხუნდაძე ასრულებენ. აღსანიშნავია, რომ თაკი მუმლაძე სცენარის თანაავტორიც არის.
„საუკეთესო სრულმეტრაჟიანი ფილმის ნომინაციაში გამარჯვება საკმაოდ მოულოდნელი და სასიხარულო იყო. ყველაზე ამაღელვებელი კი ის ემოცია აღმოჩნდა, რომელიც აუდიტორიის დამოკიდებულებამ გამოიწვია. თბილისის საერთაშორისო კინოფესტივალის ჯილდოს მიღება განსაკუთრებით მნიშვნელოვანი იმიტომ არის, რომ ეს ჩვენს ქვეყანაში ხდება. „ჩემი ოთახი“ იყო მცდელობა იმისა, რომ ქართველ გოგოებზე გველაპარაკა. როდესაც რაღაცას აკეთებ, ყოველთვის გაქვს კითხვის ნიშანი, რამდენად მართებულია შენი არჩევანი, შენი ხედვა. როცა ასეთი შედეგები გიდასტურებს, რომ სწორი გზით წახვედი, ძალიან მძაფრი შეგრძნება გეუფლება.“ – აღნიშნა Billboard Georgia-სთან საუბრისას ფილმის მთავარი როლის შემსრულებელმა და სცენარის თანაავტორმა, თაკი მუმლაძემ.
კინოფესტივალის გამარჯვებულების გამოვლენისა და დაჯილდოების ცერემონიის ოფიციალური ნაწილის შემდეგ, კინოთეატრ „ამირანში“ დიტო ცინცაძის ახალი ფილმის, „როქსის” ჩვენება გაიმართა.
თბილისის 23-ე საერთაშორისო კინოფესტივალი 11 დეკემბერს სრულდება.
