კოკა ნიკოლაძე ნორვეგიაში მოღვაწე არტისტია, რომელსაც მსმენელი ექსპერიმენტული პროექტებით იცნობს. ხუთ წელზე მეტია, რაც კოკა უნიკალურ მუსიკალურ ინსტრუმენტებს ქმნის. ამჯერად, მან ახალი გამოგონება – Drone Box No.1. წარადგინა.
როგორც ვიდეოს აღწერაში ვკითხულობთ, ეს არის ოთხხმიანი სინთეზატორი, რომელიც ძრავებზე დამაგრებული ობიექტების მეშვეობით, სხვადასხვა ჟღერადობას ქმნის. ამ ობიექტების შეცვლა კი, ნებისმიერ დროს არის შესაძლებელ. ყუთი MIDI კლავიატურით, ან კომპიუტერით იმართება. ინსტრუმენტს ხმის მართვის ჭკვიანი ავტომატური რეჟიმიც აქვს.
„პირველი ინსტრუმენტის იდეა სრულიად სპონტანურად გამიჩნდა. არც აღმიქვია სერიოზულად, უბრალოდ დავჯექი სახელოსნოში და გავაკეთე. მერე ვეღარ გავჩერდი. ასეთი სპონტანური იდეები ხშირად ჩნდება და ქრება. ამჯერად იდეა დაიბადა და შემდეგ აღმოჩნდა, რომ რასაც სერიოზულად არ აღვიქვამდი, საბოლოოდ ჩემი კარიერის მნიშვნელოვან ნაწილად იქცა. ეს დღემდე მიკვირს. ამჟამად კერძო კოლექციებისთვის რამდენიმე ახალ ინსტრუმენტზე ვმუშაობ.” – კოკა ნიკოლაძე, არტისტი.
კოკა ნიკოლაძეს ნორვეგიაში საკმაოდ აქტიური და წარმატებული მუსიკალური კარიერა აქვს. ის „ნორვეგიის მუსიკის აკადემიაში“ (Norges musikkhøgskole) ასწავლის. ამჟამად, კოკა ნორვეგიელ მუსიკოსთან, თინე ჰელსეტთან და „ნორვეგიულ ხმებთან“ პრემიერისათვის ემზადება.
