6, 7 და 8 აპრილს სოხუმის დრამატული თეატრის სცენაზე სპექტაკლის პრემიერა შედგება. „ვთამაშობთ კაბუკის” მე-15 საუკუნის იაპონური პიესის „აბრეშუმის ფარანის” მიხედვით დაიდგა. სპექტაკლის რეჟისორი დავით პაპავაა. სცენოგრაფი და კოსტიუმების ავტორი – Molu. ქორეოგრაფია ნათია ბუნტურს, ხოლო მუსიკალური გაფორმება დავით საყვარელიძეს ეკუთვნის.
დავით პაპავა:
„ეს კაბუკის თეატრის ერთ-ერთი ყველაზე პოპულარული პიესაა იაპონიაში, რომელიც იქ ყოველწლიურად იდგმება. ჩვენ, რა თქმა უნდა, იმის პრეტენზია ვერ გვექნება, რომ 100%-ით კაბუკი გავაკეთოთ. Ამიტომაც ჰქვია სპექტაკლს „ვთამაშობთ კაბუკის”. გვაქვს მცდელობა, კაბუკის რამდენიმე ელემენტი გამოვიყენოთ. Ესენია: კოსტიუმები, პლასტიკა, მაკიაჟი, მუსიკალური ინსტრუმენტები.
სიუჟეტს რაც შეეხება, ეს არის სიყვარულის ისტორია, მაგრამ უცნაური ისტორია. სამურაის უყვარდება გოგონა, რომელიც აღმოჩნდება აჩრდილი, ანუ გარდაცვლილი სული. მიუხედავად იმისა, რომ სამურაის აფრთხილებენ, რომ მისთვის ეს ურთიერთობა საშიშია და შესაძლოა სიცოცხლის ფასადაც დაუჯდეს, ის მაინც იღებს გადაწყვეტილებას, რომ ამ გოგონასთან ერთად იყოს. სწორედ ამიტომ გვაქვს მოფიქრებული ასეთი ფინალი, რომ მათი სულები ერთმანეთს სამოთხეში ხვდებიან.”
რეჟისორის გადაწყვეტილებით სპექტაკლში გამოყენებულია ვიზუალური ჩანართები ვიდეოების სახით, რომლებიც მაყურებელს ამბის უკეთ აღქმაში ეხმარება. გარდა ამისა, „ვთამაშობთ კაბუკის” ტრადიციული კაბუკისგან კიდევ ერთი მთავარი რამ განასხვავებს.
„სპექტაკლი კიდევ იმით არის საინტერესო, რომ კაბუკის თეატრში მხოლოდ მამაკაცები თამაშობენ. ყველა როლს,როგორც კაცის, ასევე ქალის, ისინი ასრულებენ. ჩვენ კი პირიქით გავაკეთეთ. ეს ჩემი იდეა იყო, რომ აქ ყველა როლი ქალებს ეთამაშათ. არც გამიგონია, ასეთი რამ თუ მომხდარა კაბუკის თეატრში. დიდი გამოწვევა და ექსპერიმენტია.”
ნახეთ ფოტოები სპექტაკლის რეპეტიციიდან
