20 წელი გავიდა მას შემდეგ, რაც Linkin Park-მა 2003 წელს თავისი ჰიტად ქცეული მუსიკალური ვიდეო – Numb გამოუშვა. ამჯერად კლიპმა ვიდეოების გაზიარების პლატფორმა YouTube-ზე 2 მილიარდ ნახვას გადააჭარბა. ეს ბენდის პირველი ნამუშევარია, რომელმაც ამ მაჩვენებელს მიაღწია.
Numb-ის კლიპმა ერთ მილიარდ ნახვას 2018 წელს გადააჭარბა. მაშინ ამ რეიტინგულ შედეგს ნამუშევარმა ფანების დამსახურებით მიაღწია. 2017 წელს Linkin Park-ის ფრონტმენი, ჩესტერ ბენინგტონი გარდაიცვალა. ერთი წლის შემდეგ კი მუსიკოსის და ბენდის თაყვანისმცემლებმა არაოფიციალური კამპანია წამოიწყეს, რათა ვიდეოს მილიარდი ნახვა დაეგროვებინა.
Numb შესულია ჯგუფ Linkin Park-ის 2003 წლის ალბომში, სახელწოდებით Meteora. 2023 წლის აპრილში ალბომი 20 წლის იუბილესთან დაკავშირებით ხელახლა გამოიცა და მასში დამატებით გაერთიანდა გამოუქვეყნებელი სიმღერები, დემო ვერსიები, ცოცხალი შოუების აუდიო ჩანაწერები და ბენდის აქამდე უცნობი ვიდეო კადრები.
ნახეთ Linkin Park-ის მუსიკალური ვიდეო, რომელიც გადაღებულია სიმღერაზე Numb:
