რამდენიმე დღეა, რაც Netflix-ზე ახალი სერიალის პრემიერა შედგა. Painkiller კრიმინალური დრამაა, რომელიც ოპიოიდის კრიზისის პერიოდს ასახავს. პროექტი 6 სერიისგან შედგება და მისი რეჟისორია პიტერ ბერგი. სერიალის ხმის დიზაინზე კი ქართულმა კომპანიამ POSTRED-მა იმუშავა.
ბესო კაჭარავა – POSTRED-ის დამფუძნებელი:
„POSTRED უკვე რამდენიმე წელია თანამშრომლობს ისეთ დიდ კომპანიებთან, როგორებიცაა Sony, HBO, Paramount და მათ შორის არის Netflix-იც. აქამდეც არაერთ პროექტზე გვიმუშავია მათთან, შესაბამისად, უკვე კარგად გვიცნობენ და ამ ახალ პროექტში ჩართვის შესაძლებლობაც მოგვცეს. POSTRED-მა სერიალისთვის ხმა ამერიკულ პარტნიორ კომპანია Soundelux-ის გუნდთან თანამშრომლობით შექმნა. პირადად მე მთავარი ხმის დიზაინერი ვიყავი ჩემს მეგობართან და პარტნიორთან უაილი სტეიტმენთან ერთად.
ყველა პროექტი ინდივიდუალურ მიდგომას საჭიროებს თავისი შინაარსისა და ჟანრის შესაბამისად. უნდა აღინიშნოს, რომ ამ სერიალში ხმის დიზაინს განსაკუთრებით დიდი როლი ჰქონდა. შესაბამისად, პროცესი საკმაოდ ხანგრძლივი იყო, რამაც შესაძლებლობა მოგვცა, თითოეულ დეტალს ჩავძიებოდით და ჩვენი კრეატიული მიდგომები ბოლომდე გამოგვევლინა. ვეცადეთ, საინტერესო საუნდი მიგვეღო, რომელიც სერიალს უნიკალურს გახდიდა.”
POSTRED საერთაშორისო პროექტებზე მუშაობას განაგრძობს. კომპანიაში ამბობენ, რომ მოლაპარაკებები მიდის კიდევ ერთ მნიშვნელოვან პროექტზე, რომლის შესახებაც საზოგადოება უახლოეს მომავალში გაიგებს.
