მებო ნუცუბიძე, სასცენო სახელით Mebo Renard, ქართულ მუსიკალურ სივრცეში დაახლოებით 10 წლის წინ გამოჩნდა. იმ დრომდე ის The BearFox-ის ვოკალისტი იყო. ახალი პროექტის წარდგენის შემდეგ, Mebo Renard-მა სადებიუტო ალბომი 2015 წელს გამოსცა და არაერთ ლაივსა თუ ფესტივალზე გამოვიდა. მიუხედავად მსმენელთა საკმაოდ დიდი აუდიტორიის შეძენისა, მებომ აქტიური მუსიკალური მოღვაწეობა დროებით შეწყვიტა და დაახლოებით ხუთი წლის განმავლობაში არც ერთი სიმღერა არ გამოუცია.
Ეს პაუზა 12 თებერვალს შეწყდა, როდესაც Mebo Renard-მა მსმენელს სიმღერა სახელწოდებით „ზღვა ადიდდება”/Waters Will Rise გაუზიარა. მუსიკოსმა ნამუშევარი ვიდეოკლიპთან ერთად გააცნო მსმენელს.
მებო ნუცუბიძე:
„როდესაც მუსიკოსი ხარ, ეს არის შენი ცხოვრების განუყოფელი ნაწილი. რამდენი ხანიც არ უნდა გრძელდებოდეს შემოქმედებითი პაუზა, მუსიკისაკენ მაინც მუდმივად მიიწევ. ჩემ შემთხვევაშიც ასე მოხდა – მუსიკა არსად წასულა და სწორედ ამ სიმღერით და კლიპით, შეიძლება ითქვას, სცენას ვუბრუნდები. სხვა სიმღერებზეც ვმუშაობ და ლაივებსაც ვგეგმავ”
მებო ნუცუბიძე ავტორ-შემსრულებელია, რომლის მუსიკა ჟანრობრივი ჩარჩოებისაგან თავისუფალია, თუმცა ყველაზე მეტად მასში ინდი-ფოლკის ელემენტები იგრძნობა. ნამუშევრებში წამყვანია მელოდია, ვოკალი და ის ისტოიები, რომლებსაც ავტორი თავისი ტექსტების საშუალებით გვიყვება. ახალი ნამუშევარი, “ზღვა ადიდდება”/Waters Will Rise, მებოს უწინდელი მუსიკალური სტილისა და კონცეფციის მატარებელია.
მებო ნუცუბიძე:
„მიუხედავად იმისა, რომ ავტორ-შემსრულებელი ვარ და Mebo Renard-ის სასცენო სახელით სოლო მუსიკოსის სტატუსით ვმოღვაწეობ, სიმღერების ჩაწერისა თუ ცოცხლად შესრულებისას სხვადასხვა მუსიკოსთან ვთანამშრომლობ. ამჯერად ახალი სიმღერის პროდიუსერი ბეთხოა”.
რაც შეეხება მუსიკალურ ვიდეოს, ის ლაივ სესიის ესთეტიკით არის გადაღებული. კლიპის რეჟისორი გიორგი დეკანოიძეა, ხოლო ოპერატორი თემო დოლიაშვილი. Mebo Renard-ის უწინდელი ნამუშევრებისაგან ეს სიმღერა იმით განსხვავდება, რომ ქართული ტექსტი აქვს.
მებო ნუცუბიძე:
„ყოველთვის იმ ენაზე ვმღერი, რომელიც იმ მომენტში სათქმელის გადმოსაცემად ყველაზე ბუნებრივად მეჩვენება. ამჯერად ქართულად არის ტექსტი და სწორედ ის ამბავი და შეგრძნებები გადმოვეცი, რომლებიც ჩემ მუსიკალურ პაუზასთან არის დაკავშირებული. ალბათ სწორედ ამიტომ ავირჩიე ეს სიმღერა დასაბრუნებლად”.
როგორც მებო ნუცუბიძე „Billboard საქართველოსთან” საუბრისას აღნიშნავს, მომავალში კიდევ ერთი სიმღერის ვიდეოს გამოუშვებს, რომელიც ამჯერად ლაივ სესიის ჩანაწერი იქნება. დროსთან ერთად მსმენელი ბევრ ახალ მუსიკალურ ნამუშევარს მოისმენს. მუსიკოსის თქმით, ალბომის გამოცემაზე ჯერ არ ფიქრობს, რადგან აუდიტორიისთვის სინგლების გაზიარებას გეგმავს.
რაც შეეხება დაგეგმილ კონცერტებს, Mebo Renard-ის უახლოესი კონცერტი 16 მარტს „კონკაში” გაიმართება.
