ქართველმა მუსიკოსებმა ლეო დელიბის ოპერიდან „ლაკმე” ცნობილი „ყვავილების დუეტი” ჩაწერეს. დუეტი სოპრანო სოფია მჭედლიშვილმა და მეცოსოპრანო ირინა შერაზადიშვილმა შეასრულეს. მომღერლებს საფორტეპიანო აკომპანემენტს კონცერტმაისტერი ნათია აზარაშვილი უწევდა. კომპოზიცია „ბრავო რეკორდში” ჩაიწერა.
სოფია მჭედლიშვილს დამთავრებული აქვს არაერთი პრესტიჟული სასწავლებელი, მათ შორის ლა სკალას აკადემია. მისი კარიერა ითვლის ისეთი თეატრის სცენებს, როგორებიცაა იტალიის ლა სკალასა და საფრანგეთის რენის საოპერო თეატრები. ქართველი სოპრანო ასრულებს მთავარ პარტიებს ოპერებში „ლუჩია დი ლამერმური, „რიგოლეტო”, La finta giardiniera და სხვები.
ირინა შერაზადიშვილი არაერთი კონკურსის ლაურეატია. მათ შორისაა მონსერატ კაბალიეს საერთაშორისო კონკურსი და Tenor Viñas, სადაც ქართველი მეცოსოპრანო ფინალისტთა სიაში დასახელდა. ხოლო მარმანდის 33-ე საერთაშორისო კონკურსზე ის გრან-პრის მფლობელი გახდა. 2016 წლიდან ირინა შერაზადიშვილი თბილისის ოპერისა და ბალეტის სახელმწიფო თეატრის სოლისტია.
ქართველი მუსიკოსების მიერ შესრულებულ „ყვავილების დუეტს” Billboard საქართველო შემოგთავაზებთ. მანამდე კი ნახეთ სიუჟეტი ჩაწერის პროცესიდან.
