პიანისტ გიორგი გიგაშვილს Terence Judd-Hallé-ის ჯილდო გადაეცა. ჯილდოს ყოველწლიურად BBC Radio 3 ახალი თაობის გამორჩეულ ერთ პიანისტს ანიჭებს. Terence Judd-Hallé-ის ჯილდო პიანისტებისათვის მნიშვნელოვანი აღიარებაა. ის ფულად პრემიასთან ერთად, კონცერტების სერიასაც მოიცავს. დაჯილდოების გამარჯვებულის ამპლუაში გიორგი გიგაშვილი ცნობილ ინგლისურ სიმფონიურ ორკესტრთან, Hallé-სთან ერთად მანჩესტერში კონცერტს გამართავს. ის მსმენელის წინაშე ასევე წარდგება სოლო კონცერტის და სხვა მუსიკალური საღამოების ფარგლებში. დეტალური განრიგი 2 მაისს იქნება ცნობილი.
„მოუთმენლად ველით გიორგი გიგაშვილის კონცერტს The Bridgewater Hall-ში,“ – განაცხადა Hallé-ის აღმასრულებელმა ხელმძღვანელმა დევიდ ბატჩერმა.
გამარჯვებულად გამოცხადების შემდეგ კომენტარი გააკეთა გიორგი გიგაშვილმაც. პიანისტის თქმით, კარიერის დასაწყისში ასეთი ჯილდოს მიღება დიდი ბედნიერებაა. „ეს დიდ მოტივაციას მაძლევს” – აღნიშნავს გიორგი გიგაშვილი.
შეგახსენებთ, რომ გასულ წელს გიორგი გიგაშვილი BBC-ის ახალი თაობის არტისტების ორწლიანი პროგრამის მონაწილე გახდა, რაც გულისხმობს კონცერტებს BBC-ის ცნობილ ორკესტრებთან დიდი ბრიტანეთის ყველაზე პრესტიჟულ სცენებზე, ასევე სოლო კონცერტს BBC-ის Radio 3-ის პირდაპირ ეთერში, სტუდიური ჩანაწერების გაკეთებასა და სხვა აქტივობებს. სწორედ ამ პროგრამის ფარგლებში 16 აპრილს გიორგი გიგაშვილი ლონდონში BBC-ის სიმფონიურ ორკესტრთან ერთად დაუკრავს.
