TOMORROW X TOGETHER ახალგაზრდების მენტალურ ჯანმრთელობაზე ზრუნვას აგრძელებს. 28 აპრილს ცნობილი გახდა, რომ K-pop ჯგუფი UNICEF-ის (გაეროს ბავშვთა ფონდი) კორეის კომიტეტის მიერ ახალი გლობალური კამპანიის ნაწილი გახდა.
კამპანია, სახელწოდებით TOGETHER FOR TOMORROW მსოფლიოს მასშტაბით ბავშვების მენტალურ ჯანმრთელობაზეა ფოკუსირებული.
კამპანიის ანონსთან ერთად გამოქვეყნებულ ვიდეოში HUENINGKAI, TAEHYUN, YEONJUN, BEOMGYU და SOOBIN ბავშვებთან ერთად სცენაზე იკრიბებიან, საუბრობენ და დროს სასიამოვნოდ ატარებენ, კლიპს კი კორეულ ენაზე ჯგუფის ლიდერი SOOBIN ახმოვანებს.
„როგორ გრძნობთ თავს? ნაცვლად იმისა, რომ თქვენი შეცვლა ვცადოთ, ჩვენ უბრალოდ თქვენ გვერდით ვართ. მძიმე დღეები ყველას გვაქვს, ეს ჩვენც გამოგვივლია. დახმარების თხოვნა არ ნიშნავს, რომ სუსტი ხარ. საკუთარ თავზე ზრუნვა და სხვებზე დაყრდნობა სიძლიერის ნიშანია. ერთად, ჩვენ შეგვიძლია უკეთესი ხვალინდელი დღისთვის ვიყოთ მზად“. – ამბობს SOOBIN. ვიდეოს დასასრულს, K-pop ჯგუფის წევრები და ბავშვები კამპანიის სახელს აჟღერებენ: Together for tomorrow.
TOMORROW X TOGETHER-მა, რომლის 13-მა ნამუშევარმა უკვე მოიპოვა ადგილი Billboard 200-ის ჩარტებში, ახალგაზრდების ფსიქიკური ჯანმრთელობის დაცვის გლობალური კამპანია UNICEF-თან ერთად ოქტომბერში დაიწყო.
„ჩვენი მუსიკალური მოგზაურობის დროს ვისწავლეთ, რომ ემოციების გამოხატვა სიძლიერის ნიშანია, ახლა კი, “იუნისეფთან” ერთობლივი კამპანიის ფარგლებში, გვსურს, შევქმნათ უსაფრთხო და ინკლუზიური გარემო, სადაც ახალგაზრდები თავისუფლად შეძლებენ საკუთარი ემოციების გამოხატვას.” – აღნიშნა მაშინ SOOBIN-მა სიტყვით გამოსვლისას.
კამპანიის პრეზენტაციაზე ლეიბლმა BIGHIT MUSIC აიღო ვალდებულება, 1,4 მილიონი დოლარი გამოყოს ახალგაზრდული პროგრამების დასაფინანსებლად და ფსიქიკური ჯანმრთელობის პრობლემებთან დაკავშირებული სტიგმის დასაძლევად.
ნახეთ TXT x UNICEF-ის ახალი ვიდეორგოლი კამპანიისთვის TOGETHER FOR TOMORROW:
