ვაშინგტონში მდებარე ცნობილმა უმაღლესმა სასწავლებელმა „ამერიკულმა უნივერსიტეტმა“ ტეილორ სვიფტთან დაკავშირებული კურსი შექმნა. სტუდენტები ეკონომიკის სპეციალურ პროგრამას ტეილორ სვიფტს ფინანსების და მისი შემოსავლების მიხედვით შეისწავლიან. ამ კურსის წარდგენით, ვაშინგტონის „ამერიკული უნივერსიტეტი” ჰარვარდის, სტენფორდის და სხვა მრავალი აღიარებული სასწავლებლის კვალს მიჰყვება, რომლებსაც პროგრამაში ასევე აქვთ ტეილორ სვიფტთან დაკავშირებული მიმართულებები.
Swiftonomics – ასე ჰქვია კურსს, რომლის იდეა თავად ეკონომიკის მიმართულების სტუდენტებს და ამავდროულად სვიფტის დიდ გულშემატკივრებს, მეგან ვისოცკის და მაკენზი შულცს გაუჩნდათ. კურსს ზედამხედველობას გაუწევს უნივერსიტეტის ეკონომიკის ხელმძღვანელი კარა რეინოლდსი. სასწავლო სილაბუსი ისეთ თემებს გააერთიანებს, როგორიც არის, მაგალითად, ტეილორ სვიფტის მიერ საკონცერტო ტურნეს განმავლობაში მიღებული შემოსავლების გავლენა ქვეყნის ეკონომიკაზე. კურსის განმავლობაში სტუდენტები ასევე განიხილავენ ბილეთების გაყიდვების პლატფორმის, Ticketmaster-ის მონოპოლიური პოზიციის ირგვლივ დაწყებულ დებატებს. კურსზე დარეგისტრირება ონლაინ არის შესაძლებელი. სასწავლო პროგრამაზე მოხვედრისათვის სტუდენტს მიკროეკონომიკის საფუძვლები უნდა ჰქონდეთ ნასწავლი.
„ბევრმა უნივერსიტეტმა შექმნა ტეილორ სვიფტთან დაკავშირებული კურსი, თუმცა უმეტესი მათგანი ლიტერატურის, ან სოციოლოგიის დარგშია,”-აღნიშნა კურსის იდეის თანაავტორმა ვისოცკიმ. მისი თქმით, ეს თემა აკადემიური განათლების ტრენდის ათვისების კარგი საშუალება იყო. „იმედი მქონდა, რომ ტეილორ სვიფტის მსგავს პოპულარულ თემაზე ფოკუსირებით, უფრო მეტ ადამიანს დავაინტერესებდი ეკონომიკის კურსით,”- აღნიშნულია განცხადებაში.
„ეკონომიკა საზოგადოებაზე უდიდეს გავლენას ახდენს. გამოწვევა იყო, შეგვექმნა ისეთი კურსი, რომელიც [ეკონომიკის] დეპარტამენტს დაეხმარებოდა იმის აღმოჩენაში, თუ რა აინტერესებთ სტუდენტებს ყველაზე მეტად ეკონომიკის შესახებ,”- აღნიშნავს კურსის ზედამხედველი კარა რეინოლდსი.
რაც შეეხება ტეილორ სვიფტის მუსიკალურ კარიერას, ამჟამად მომღერლის ორთვიანი პაუზა დასასრულს უახლოვდება და ამის შემდეგ მისი საკონცერტო ტურნე სხვადასხვა ქალაქში გაგრძელდება. 19 აპრილს კი მომღერალი გამოსცემს ახალ ალბომს, სახელწოდებით The Tortured Poets Department.
