ბავშვთა დაცვის საერთაშორისო დღესთან დაკავშირებით 1-4 ივნისს თბილისი გოგი თოდაძის სახელობის საბავშვო და ახალგაზრდული თეატრების საერთაშორისო ფესტივალს მასპინძლობს. ფესტივალის ფარგლებში სხვადასხვა სივრცეში წარმოდგენილია 6 ქვეყნის 10-მდე სპექტაკლი.
გასული წლის მსგავსად, სოხუმის თეატრი წელსაც ღონისძიების თანაორგანიზატორი და ერთ-ერთი მასპინძელია. სწორედ სოხუმის თეატრში გაიხსნა ფესტივალი 1 ივნისს. ეროვნული სასახლის დირექტორის, თიკა რუხაძისა და ფესტივალის დირექტორის, ლევან ხეთაგურის სიტყვით გამოსვლის შემდეგ სცენა ეროვნული სასახლის ანსამბლებს დაეთმო. ღონისძიების მეორე ნაწილში კი მაყურებლის წინაშე პირველად ჩინეთის თეატრის ასოციაციის საბავშვო დასი წარდგა.
ახალგაზრდებსა და პატარა მაყურებელს სოხუმის თეატრმა 2 ივნისსაც უმასპინძლა. თავისუფალი დასწრების ფარგლებში წარმოდგენილი იყო სპექტაკლები „აისია“ (მარნეული, საქართველო), „პატარა უფლისწული“ (სომხეთი) და „ხმაური და ტროლები მთებში“ (საფრანგეთი/საქართველო).
თბილისის საბავშვო და ახალგაზრდული თეატრების ფესტივალი 2018 წელს დაარსდა, 2022 წლიდან კი ის გოგი თოდაძის სახელს ატარებს. წელს ფესტივალი მეოთხედ ტარდება. ფესტივალის ორგანიზატორები ეროვნული სასახლე და საქართველოს ხელოვნების სამეცნიერო-კვლევითი ინსტიტუტია. ღონისძიება თბილისის მერიის მხარდაჭერით ხორციელდება.
