Coldplay-მ მე-10 სტუდიური ალბომის გამოსვლის თარიღი დააანონსა. მაქს მარტინის პროდიუსერობით ალბომი Moon Music 4 ოქტომბერს გამოვა. LP-ის პირველი სინგლი კი სახელწოდებით feelslikeimfallinginlove, 21 ივნისს გამოქვეყნდება.
Coldplay-მ ახალი ალბომიდან სიმღერა პირველად ბუდაპეშტში 16 ივნისს გამართულ კონცერტზე შეასრულა. მანამდე კი ჯგუფმა ახალი სიმღერის ფრაგმენტები სოციალურ ქსელში გაავრცელა.
აღსანიშნავია, რომ Coldplay-მ კრებულის Moon Music-ის გამოსაშვებად დიდი ძალისხმევა გასწია, რათა ნამუშევარი გარემოს დაცვის ინტერესების გათვალისწინებით მდგრადი ყოფილიყო. თითოეული 140-გრამიანი LP ცხრა გადამუშავებული პლასტმასის ბოთლისგან არის შექმნილი, ხოლო CD ვერსია, როგორც განცხადებაშია აღნიშნული, მსოფლიოში პირველი EcoCD-ია, რომელიც 90% რეციკლირებული პოლიკარბონატისგან არის მიღებული.
Moon Music-ის პირველი გამოცემა (EcoRecord rPET LP და EcoCD) შეზღუდული რაოდენობით იქნება ხელმისაწვდომი, რომელიც ინდივიდუალური დანომრილი სერიული ნომრებით არის წარმოებული.
Coldplay-ს Spheres-ის მხარდასაჭერი გლობალური საკონცერტო ტურნე 2022 წლის 18 მარტს კოსტა-რიკაში დაიწყო. მრავალწლიანი ტურნეს 2024 წლის ბოლო შოუ კი 16 ნოემბერს ახალ ზელანდიაშია დაგეგმილი.
