ტატო კოტეტიშვილის მხატვრული ფილმი „წმინდა ელექტროენერგია“ ლოკარნოს საერთაშორისო კინოფესტივალზე

ტატო კოტეტიშვილის მხატვრული სრულმეტრაჟიანი ფილმის „წმინდა ელექტროენერგიის“ მოქმედება ქალაქ თბილისში ვითარდება. ახალგაზრდა ბიჭი სახელად გონგა და მისი ბიძაშვილი ბარტი ჟანგიანი ჯვრებით სავსე ჩემოდანს პოულობენ. ფილმის პერსონაჟებს უჩნდებათ იდეა, რომ ჯვრები ნეონის განათებით გააფორმონ და თბილისის გარეუბნებში გაყიდონ.

ეს არის ფილმი სიყვარულისა და მეგობრობის შესახებ. სცენარი თბილისის ურბანულ გარემოში საინტერესოდ ვითარდება, სადაც ქალაქის ტექსტურა, ფერები და გარემო სოციალურ ასპექტებს გამორჩეული ექსცენტრული ქმედებით გვიჩვენებს.

ტატო კოტეტიშვილი – ფილმის რეჟისორი:

„ეს ყველაზე გრძელვადიანი პროექტია, რაზეც ოდესმე მიმუშავია. იდეის გაჩენიდან დღემდე ალბათ 5 წელი გავიდა, პანდემიასაც კი გაუძლო და ახლა, 11 აგვისტოს,  ლოკარნოს ფესტივალზე შედგება მისი პრემიერა.

ბოლო  პერიოდში მომრავლებულმა განათებულმა  „ლედ” ჯვრებმა მომცა ბიძგი, დამეწყო ამ ფილმის იდეაზე მუშაობა. 

რაც შეეხება საქართველოს,  პრემიერა ჯერჯერობით არ ვიცით რომელ ფესტივალზე გაიმართება, მაგრამ, რაც მეტ ხალხს ექნება ფილმის ნახვის საშუალება, მით უკეთესი, ამიტომ სიამოვნებით ვაჩვენებთ ყველგან.”

ფილმის რეჟისორი და დამდგმელი ოპერატორი ტატო კოტეტიშვილია, სცენარის ავტორები ტატო კოტეტიშვილი, ირინე ჟორდანია და ნუცა ცირეკიძე, მთავარ როლებს კი ნიკოლო ღვინიაშვილი და ნიკა გონგაძე ასრულებენ. მხატვრული ფილმის პროდიუსერები  ტატო კოტეტიშვილი (Zango Studio) და თეკლა მაჭავარიანი (Nushi Film) არიან. თანაპროდიუსერები: ინეკ სმითი (GOGO FILM), ინეკ კანტერსი, ლისეტე კელდერი (The Film Kitchen), გუკა რჩეულიშვილი, მარიშა ურუშაძე (Arrebato Film). ფილმის მხარდამჭერები კი საქართველოს კინემატოგრაფიის ეროვნული ცენტრი, როტერდამის საერთაშორისო კინოფესტივალის პროგრამა, ნიდერლანდების კინოფონდის ერთობლივი განვითარების პროგრამა და როტერდამის საერთაშორისო კინოფესტივალის ჰუბერტ ბალსის ფონდი გახლავთ.

აგვისტოში, ლოკარნოს 77-ე კინოფესტივალზე ფილმი „წმინდა ელექტროენერგია“ კინოფესტივალის საკონკურსო სექციაში „აწმყოს კინო-რეჟისორები“ (Concorso Cineasti del Presente) წარდგება.

ლოკარნოს საერთაშორისო კინოფესტივალი შვეიცარიის ქალაქ ლოკარნოში 1946 წლიდან იმართება. ფესტივალის ერთ-ერთი მთავარი მიზანი ახალგაზრდა, ნიჭიერი რეჟისორებისა და მსახიობების აღმოჩენაა. გამომდინარე აქედან, ლოკარნოს ფესტივალი არაერთი კინორეჟისორისა და მსახიობის წარმატების საწყისი გამხდარა.