დონალდ გლოვერმა მუსიკალური პროექტის, Childish Gambino-ს ბოლო ალბომი Bando Stone & The New World გამოუშვა. ალბომში 17 ტრეკია გაერთიანებული და ის 19 ივლისიდან ყველა მუსიკალურ სტრიმინგ პლატფორმაზეა ხელმისაწვდომი.
ახალ LP-ში სპეციალურად მოწვეული მუსიკოსები – ჯორჯა სმიტი, ფლო მილი, სტივ ლეისი, Yeat, Foushee, Amaara და სხვა ცნობილი არტისტებიც მონაწილეობენ.
კვირის დასაწყისში დონალდ გლოვერი პოდკასტ Hot Ones-ში იმყოფებოდა, სადაც განმარტა, თუ რატომ სურს სასცენო სახელ Childish Gambino-ს დაემშვიდობოს.
„ყოველთვის ვიცოდი, რომ Childish Gambino პერსონაჟი იყო, რომელიც გარკვეული დროის შემდეგ უნდა დასრულებულიყო. Childish Gambino თითქოს „ბოსი“ იყო ოფისში, ასეთი რაღაცები 10 წლის წინ უფრო მუშაობდა, მაგრამ ახლა უკვე სხვა საკითხია. ალბათ ცოტა სამწუხაროა ეს ყველაფერი, მაგრამ ცხოვრება გრძელდება და ეს მშვენიერია.“
Childish Gambino-მ მომავალ ტურნეზეც ისაუბრა და გულშემატკივრებს მიმართა:
“ეს გულშემატკივრებისთვის ბოლო მზის ჩასვლას გავს, ეს თქვენთვის კეთდება. ჩემ ლაივ შოუზე თუ რომელიმე გულშემატკივარს იმედები გაუცრუვდება და წასვლას დააპირებს, მზად ვარ, ბილეთის საფასურიც ავუნაზღაურო. ეს არ არის ხუმრობა, შეიძლება ჩემმა ადვოკატებმა თქვან, რომ ვხუმრობ, თუმცა მე ნამდვილად არ ვხუმრობ.“
მსოფლიო ტურნე 2024 წლის 11 აგვისტოს ოკლაჰომა სიტიში დაიწყება და 11 თებერვალს დასრულდება.
ახალი ალბომი Bando Stone & The New World ამავე სახელწოდების ფილმის საუნდტრეკიცაა, რომლის გამოსვლის თარიღიც ჯერჯერობით უცნობი რჩება.
ნახეთ Childish Gambino-ს ბოლო ალბომი:
