პოლ მაკარტნი „მზიურის“ კაფეს მხარდაჭერას უცხადებს

13 აგვისტოს სოციალურ ქსელში კაფე „მზიურის“ წერილი გამოქვეყნდა, რომელშიც ბითლზის ლეგენდა სერ პოლ მაკარტნი დაწესებულებას მხარდაჭერას უცხადებს: 

„მე სრულად ვუჭერ მხარს ანას ძალისხმევას კაფესთან დაკავშირებით და დიდი იმედი მაქვს, რომ მას კვლავაც მიეცემა “უხორცო ორშაბათის” კარგად განხორციელების საშუალება” – ნათქვამია პოლ მაკარტნის წერილში.

ანა გოგუაძე „მზიურის“ კაფეს დამაარსებელი:

„მზიურის“, როგორც სოციალური კაფეს კონცეფცია იმაში მდგომარეობს, რომ ის სოციალური საწარმო გახლავთ. ის ფუნქციონირებს სოციალური საწარმოს პრინციპებით, რაც გულისხმობს, რომ ის ოპერირებს, როგორც ჩვეულებრივი ბიზნესი, თუმცა ჩვეულებრივი ბიზნესისგან განსხვავებით მოგება სოციალური მიზნების განხორციელებას ხმარდება. 2016 წელს გავხსენით ეს კაფე და მაშინ პარკი ფაქტობრივად მიტოვებული იყო. პირვანდელი მისია სწორედ პარკის გამოცოცხლება იყო და შემდგომში უკვე ჩვენი საქმიანობიდან გამომდინარე ვქმნით ინკლუზიურ, ადაპტირებულ სივრცეს ქალაქის ცენტრში, ვახორციელებთ ადამიანის უფლებების და ცხოველთა დაცვის მიმართულებით სხვადასხვა აქტივობებს. 

2017 წლიდან კაფე „მზიური“ პოლ მაკარტნის საერთაშორისო კამპანიას, Meat Free Monday-ს შეუერთდა, რაც ადამიანების ცნობიერების ამაღლებას და ამ პრინციპით მუშაობას გულისხმობს. არ არის სავალდებულო, იყო ვეგეტარიანელი, მაგრამ, თუნდაც ერთ დღეს, ანუ ორშაბათს, შეგიძლია, სერიოზული ცვლილება მოუტანო გარემოს. ამაში იგულისხმება ის ქარხნები, რომლებიც ამუშავებენ ხორცს და რომელსაც ძალიან დიდი ეკოლოგიური ზიანი მოაქვს გარემოსთვის. 

კამპანიის ფარგლებში სხვადასხვა კაფეები და კვების ობიექტები მსოფლიოს მასშტაბით არიან ამ კამპანიის წევრები, თუმცა ამიერკავკასიაში კაფე „მზიური“ არის ერთადერთი, რომელიც ამ კამპანიის მიმდევარია და ორშაბათობით ჩვენ ხორციანი კერძები სრულად გვაქვს ამოღებული. ჩვენ ასევე არ მოვიხმართ პლასტიკატს და სტუმრებსაც და გარშემომყოფ ადამიანებსაც აქვთ საშუალება, რომ მოიტანონ პლასტიკატი, ჩვენ ვაგროვებთ მას და შემდეგ გადასამუშავებლად ვაგზავნით.

სწორედ ამ კამპანიის შედეგად გვქონდა თავიდანვე Meat Free Monday-ს სათავო ოფისთან ურთიერთობა და პოლ მაკარტნიმაც იცოდა უკვე „მზიურის“ კაფეს შესახებ. 2021 წელს მან კაფე „მზიურს“ მიულოცა დაბადების დღე, როცა 5 წლის გავხდით და მოლოცვა საკუთარ გვერდზე გააზიარა. კამპანიის ფარგლებში სულ გვქონდა მიმოწერა, მე უშუალოდ შევხვდი თავად  Meat Free Monday-ს ოფისის ხელმძღვანელს შარშან ლონდონში და წელს, ასე ვთქვათ, ეს ამბები რომ მოხდა მერიასთან დაკავშირებით, მივწერეთ ჩვენი ამბავი და მან ეს მესიჯი გამოგვიგზავნა, რომელიც ჩვენს გვერდზეც გვიდევს.

სოციალური საწარმო კაფე „მზიური“ უკვე 8 წელია, რაც ფუნქციონირებს. „მზიურის“ კაფეში ხშირად იმართება კულტურული ღონისძიებები: კინოჩვენებები, კონცერტები და სხვადასხვა სოციალური აქტივობები. ივნისში კი კაფემ მერიისგან წერილი მიიღო, სადაც  ნათქვამია, რომ შენობის აუქციონზე გატანა იგეგმება.